Министрлер кабинетинин төрагасы Акылбек Жапаров иш сапары менен Армениянын Ереван шаарына барат. Сапардын алкагында Евразиялык өкмөттөр аралык кеңештин жыйынына катышат. Ошондой эле Евразия экономикалык форумдун пленардык жыйынында сөз сүйлөйт. Мындан тышкары бир катар жолугушуулар пландалган. Евразиялык өкмөттөр аралык кеңештин жыйынына Армениянын премьер-министри Никол Пашинян, беларусь премьер-министри Роман Головченко, Казакстандын өкмөт башчысы Олжас Бектенов, Орусия өкмөтүнүн төрагасы Михаил Мишустин катышат. Евразия өкмөттөр аралык кеңешинин жыйынынын күн тартибине 20дан ашык маселе киргизилген.
Мектептерди китеп менен толук камсыз кылуу үчүн 8 миллиард сом талап кылынат. Бул тууралуу Жогорку Кеңештин Социалдык саясат боюнча комитетинин 30-сентябрдагы жыйынында финансы министри Алмаз Бакетаев депутаттын суроосуна жооп берип жатып айтты. Депутат Жылдыз Садырбаева окуу китептеринин жетишсиздиги жөнүндө маселе жыл сайын пайда болуп, чечилбей келгенин сындады. «Жыл сайын окуу китептерин сатып алууга 150 миллион сомдон 200 миллион сомго чейин каражат бөлөбүз. Бирок чынында мектеп окуучуларын китеп менен камсыз кылуу үчүн 8 миллиард сом керектелет. Ошондуктан биз Билим берүү министрлиги менен биргеликте жакынкы эки-үч жылда бул маселени чечүүнүн механизмдерин киргизип жатабыз. Балким, электрондук китептерди жана планшеттерди чыгарабызбы, ар кандай жолдорун издеп жатабыз. Сегиз миллиард сом аз акча эмес. Ошондуктан биз бул маселени этап-этабы менен чечип жатабыз» , — дейт финансы министри Алмаз Бакетаев. Улуттук статистика комитетинин маалыматы боюнча, 2012-2022-жылдарда окуучулардын саны 435 миң 414 балага өсүп, 1 млн 447 миң 717ни түздү. Бүгүнкү күндө мамлекеттик жалпы билим берүү уюмдарынын китепкана фондунда 11 млн 816 миң 255 окуу китеби бар. Бул жалпы керектөөнүн 68,5 % түзөт.
Өлкө боюнча он райондук электр тармактарында акылдуу эсептегичтер орнотулду. Бул тууралуу «Кыргызстан улуттук электр тармагы» ишканасынын басма сөз кызматы кабарлады. Маалыматка караганда, акылдуу эсептегичтер Каракол, Түп, Чолпон-Ата, Нарын, Кочкор, Тянь-Шань РЭТтери, Жалал-Абад жана Ош шаардык электр энергиясын сатуу кызматы, Талас жана Үч-Коргон участогунда толук орнотулду. Баткен шаарында акылдуу эсептегичтерди орнотуу 50 пайызга бүттү. Акылдуу эсептегичтерди ишке киргизүү — электр камсыздоонун процесстерин автоматташтырууга, маалыматты, эсеп-кысаптарды алыстан чогултууга, дебитордук карызы бар абоненттерди алыстан өчүрүүгө, төлөм жүргүзүлгөндөн кийин кайрадан туташтырууга, эсептегичтин уруксатсыз ачылышы тууралуу сигналды алыстан алууга жана башка иштерди аткарууга мүмкүнчүлүк берет.ЭМИ ВАЛЮТА КУРСУ МЕНЕН ТААНЫШЫП АЛЫНЫЗДАР: Улуттук банктын билдирүүсү боюнча ушул тапта: 1 АКШ доллары 84 сом 20 тыйынга 1 евро 93 сом 84 тыйынга 1 рубль 91 тыйынга Казак тенгеси 18 тыйынга барабар МУНАЙ БААСЫ Бишкекте орто