БИШКЕК, 29-сен. — Sputnik. Батыштын акыл калчап, ой жүгүртө алгандары РФ президенти Владимир Путиндин акыркы эки жылдан бери айтып жаткан кебине кулак салышты. Бул тууралуу Россия лидеринин маалымат катчысы Дмитрий Песков журналист Павел Зарубиндин суроолоруна жооп берип жатып айтты.
Журналист Кремлдин өкүлүнө бир катар суроолорду узатып, жообун Telegram каналына жарыялаган.
"Россиянын чек арасына жакын жерде чыңалуудан жана Украинанын айланасындагы жаңжалга өзөктүк державалар Киев тарапта катышканы жана НАТОнун аскердик инфраструктурасы биздин чек араларга жакындай баштаганы өзөктүк куралды ооздуктоо жаатындагы мамлекеттик саясатка оңдоп-түзөтүүлөрдү киргизүү зарылдыгын жаратты. Учурда ал өзгөртүүлөр даярдалды, эми таризделет", — деди Песков.
Буга утурлай Зарубин Батыш саясатчылары Путиндин акыркы эки жылдагы билдирүүлөрүн кулак салбай жатышкансыйт деген маанидеги собол узаткан.
"Акыл калчай алгандар угушту, куру кыйкырык салгандар акылсыз саясатын улантууда. Ал өз кезегинде терс натыйжа бериши ыктымал", — деген Песков.
Ал Батыш мамлекеттеринин (жаңжалга) аралашуусу токтогондун ордуна күчөп жатканын белгилеп, ал эми Киевдегилер Украина жаңжалында Москваны тынчтык сүйлөшүүлөргө мажбурлоо боюнча "утопиялык" ой калчап жатышканын кошумчалаган.