Кыргызстан менен Казакстандын чек арасында соода-логистикалык комплекс курулат. Эки өлкөнүн өкмөттөрүнүн ортосундагы соода-логистикалык комплекс түзүү жана ишин жөнгө салуу жөнүндө макулдашууну ратификациялоо тууралуу мыйзамга Казакстандын президенти Касым-Жомарт Токаев кол койду. Комплекс "Ак-Тилек" жана "Карасуу" өткөрмө пунктуларынын жанында жайгашат. Аянты 7,6 чарчы чакырым болсо, анын 4 чарчы чакырымы кыргыз тараптыкы, калганы казактарга тиешелүү болот. Соода-логистикалык комплекс өндүрүш аянтчаларынан, товарларды жана жабдууларды сактоочу кампалардан, ошондой эле транспорттук инфраструктурадан турат, бул товарларды жеткирүүнү тездетип, логистикалык чыгымдарды азайтат. 2023-жылы июнда Кыргызстан менен Казакстан соода-логистикалык комплекс түзүү боюнча келишимге кол коюшкан. Бул экспортко багытталган кирешелүү долбоорлорду ишке ашырууга жана экономиканын айрым секторлорунун, анын ичинде өндүрүштү жана сатууну башкаруунун алдыңкы технологияларын колдонуу аркылуу атаандаштыкка жөндөмдүүлүгүн жогорулатууга мүмкүндүк берет.
Кара-Суу райондук кадастр бөлүмүнүн мурдагы башчысы УКМК кызматкерине пара берүүгө аракет кылган жеринен кармалды. Бул тууралуу атайын кызмат билдирди.Маалыматка караганда, ал убагында социалдык объектилерди курууга багытталган жер тилкелерин мыйзамсыз берип жиберген. "Кылмышкер жетекчи болуп турганда Кара-Суу районунун Датка айыл аймагындагы Ачы массивинин башкы планына өзгөртүүлөрдү киргизген. Ошондой эле мектеп, бала бакча курууга арналган жер тилкелерин мыйзамсыз бергендиги аныкталган. Ал кылмыш жоопкерчилигинен кутулуу үчүн УКМК кызматкерине 15 миң доллар пара сунуштаган", — деди атайын кызмат. Шектүү УКМКнын тергөө абагына киргизилди.
Казакстандын көкпар боюнча курама командасы Ысык-Көлдө өтө турган "Биримдик" кубогуна келбейт. Бул тууралуу Informburo. Kz басылмасына коңшу өлкөнүн Көкпар федерациясы билдирген. "Федерация Ысык-Көлдө өтө турган "Биримдик" кубогуна катыша албайт. Себеби бул датага башка маанилүү иш-чаралар пландалган. Учурда көкпарчылар ошол оюндарга даярданып жатат", — деп билдирген Көкпар федерациясы. Буга чейин Астанада өткөн Дүйнөлүк көчмөндөр оюндарында көкпардын финалы чуу менен аяктаган. Мындан кийин Кыргызстандын Көк бөрү федерациясы казак тарапка "Биримдик" кубогун 1-ноябрда Ысык-Көлдүн жээгинде өткөрүүнү сунуштаган.
Россия Федерациясынын Мамлекеттик Думасынын спикери Вячеслав Володин Ливандагы электроника жардырууларына комментарий берип жатып, мындай "куралды" массалык түрдө чыгаруу террорчулукту жаңы деңгээлге көтөрөрүн айтты. Төрага кылмыштарга каршы чара көрүү керектигин белгилеген. "Турмуш-тиричилик электроникасынын жардыргыч түзүлүш катары колдонулушунун өзү тиешелүү иликтөөнү талап кылат. Мындай "куралды" массалык түрдө жайылтуу терроризмди жаңы деңгээлге чыгарат. Бул бардык өлкөлөр үчүн глобалдык коркунуч, мындай кылмыштарга каршы чара көрүү керек", — деп жазат Володин. Саясатчы эл аралык институттар мындай кылмыштарга каршы чараларды иштеп чыкпаса бир дагы адам өзүн коопсуз сезе албай турганын белгиледи.