"Каркыра-автожол" өткөрмө пунктунун күндүз иштөө режимин "күнү-түнү" деп алмаштырууну караган мыйзам долбоору Жогорку Кеңеште биринчи окууда кабыл алынды. Тиешелүү макулдашууга өзгөртүү киргизүүнү министрлер кабинети демилгелеген. Мыйзам долбоорун Чек ара кызматынын директору Уларбек Шаршеев тааныштырды. "Каркыра" өткөрүү пунктунун иштөө режимине өзгөртүү киргизүү кыргыз-казак мамлекеттик чек арасынан өтүүгө ыңгайлуу шарттарды түзүү жана Ысык-Көл облусунда кышкы туризмди өнүктүрүү, ошону менен бирге ички жана чет элдик туристтердин агымын көбөйтүү, инфратүзүмүн жакшыртуу зарылчылыгы менен шартталган", — деди Шаршеев. Депутаттар бул демилге туризмдин илгерилешине өбөлгө болорун белгилешти.
Контейнерлерден таштандыны иргеп чогултуу мыйзамдын бузулушуна кептеп, айыпка жыгат. Бул тууралуу Бишкек шаардык мэриясынан билдиришти. Муниципалдык инспекция калдыктар менен иштөө чөйрөсүндөгү мыйзам бузулган учурлар көбөйгөнүн белгилөөдө. "Мыйзамга ылайык, контейнердеги таштанды мамлекеттик, жергиликтүү башкаруу органдардын менчиги болуп саналат. Ал эми таштанды чогулткандар контейнерлердин айланасында башаламандык жаратып, мындан борбордун сырткы көрүнүшү бузулууда. Контейнерден таштанды чогултууга тыюу салынат. Бул Бишкек шаарын көрктөндүрүү эрежелеринде бекитилген", — деп айтылат маалыматта. Ошондой эле жобону бузгандарга айып пул салынарын эскертти.
Кыргызстандыктар Чет элдик окуучулардын орус тили боюнча эл аралык олимпиадасына катыша алат. Бул тууралуу Россиянын Пушкин атындагы Мамлекеттик орус тили институту кабарлады. Учурда арыздарды кабыл алуу башталды. Ага чет элдик мектептердин жогорку класстарынын окуучулары, ошондой эле 14-18 жаштагы жеке катышуучулар чакырылат. Белгилей кетчү жагдай, Россиянын жарандыгы бар же ага арыз берген адамдар катыша албайт. Каалоочулар "Образование на русском" порталына катталып же логин менен кирип, 23-сентябрга чейин катышуучунун формасын толтурушу керек. Тандоо туру жана жарым финал аралыктан өтөт. Ал эми финалдык бөлүк 30-октябрдан 3-ноябрга чейин Москвада болот. Уюштуруу комитети финалга чыккандардын жол киресин, жатаканасын жана тамак-ашын каржылайт.
Ливандын ар кай жеринен жарылган пейджерлерге тайвандык Gold Apollo компаниясынын тиешеси жок, аларды европалык компания иштеп чыгып, жасаган. Мындай билдирүүнү аталган ишкананын башчысы Сюй Цингуан билдиргенин РИА Новости жазды. Буга чейин эл аралык ири ЖМКлардын бири маалымат булагына таянып, Израилдин "Моссад" деп аталган чалгын кызматы Тайвань өндүрүшүнөн чыккан, "Хезболла" буюртма берген беш миң пейджерге жарылчу заттарды салып койгон деп жазган. Ал киши аталган техника Gold Apollo деп аталган тайвандык фирмага буюртма берилди деген. Сюй Цингуан үч жыл мурда анын ишканасы европалык компаниялардын бири менен кызматташуу боюнча келишим түзгөнүн айтып берген. Алгач алар Gold Apollo компаниясынын продукциясына дистрибьютердик кылып иштешкен, бирок кийинчерээк кеп болуп жаткан пейджерлерин өз алдынча иштеп чыга башташкан. Тараптар европалыктар иштеп чыккан бул техникалар Gold Apollo логотиби менен сатыларын айтышкан.