БИШКЕК, 17-сен. — Sputnik. Бишкек — Ош жолунда айдоочусу жок фура ордунан жылып дарыяга түшүп кеткен. Бул тууралуу Чүй облустук милициясы билдирди.
Маалыматка караганда, жүк ташуучу транспорт көпүрөнү сүзүп токтогон.
"Окуя 15-сентябрь күнү болгон. Айдоочу шериги менен Оштон Бишкекке келе жаткан. Төө-Ашуудан түшкөндөн кийин алар тамактануу үчүн токтошкон. Ашканадан чыкканда машинаны ордунан таппай калышкан. Дароо издөө салып, натыйжада фура дарыядагы көпүрөнү сүзүп токтоп калганын көрүшкөн", — деди милиция.
Кийин маалым болгондой, айдоочу жүк ташуучу транспортту кол тормозго койбой кетип калгандыктан транспорт эңкейиштен жылып кеткен. Бактыга жараша, кырсыктан эч ким жабыркаган эмес.