БИШКЕК, 16-сен. — Sputnik. Чүй облусунун Кемин районунда базар баасы 119 миллион 937 миң сомду түзгөн мурдагы касапкана жана колбаса чыгаруучу ишкана жери менен мамлекеттин балансына кайтарылды. Бул тууралуу УКМК билдирди.
Маалыматка караганда, аймак мыйзамсыз менчиктештирилген мамлекеттик объектилерди табуу жана кайтаруу боюнча жүргүзүлүп жаткан иш-чаралардын алкагында аныкталган.
"Аталган объектини 1995-жылы айрым кызмат адамдары жеке менчигине алып, бүгүнкү күнгө чейин өз кызыкчылыктары үчүн пайдаланып келген", — деди атайын кызмат.
УКМК мамлекеттик мүлктү мыйзамсыз менчиктештирүү фактыларын аныктоо боюнча иштерди улантууда.