БИШКЕК, 14-сен. — Sputnik. Бишкекте балдардын тубаса жана кийин пайда болгон жүрөк ооруларын диагностикалоого жана хирургиялык дарылоого адистешкен борбор курула баштады. Бул тууралуу Саламаттык сактоо министрлиги маалымдады.
Билдирүүгө ылайык, Балдар кардиохирургия борборунун жаңы имаратынын пайдубалына капсула салуу аземи 13-сентябрда өттү.
"Салтанаттуу иш-чарага саламаттык сактоо министри Алымкадыр Бейшеналиев, Улуттук илимдер академиясынын академиги Кубанычбек Жумалиев, Жүрөк хирургиясы жана органдарды трансплантациялоо илимий-изилдөө институтунун жетекчилиги, кызматкерлери жана башка коноктор катышты. 75 орундуу беш кабаттуу борбордун курулушуна академик Кубанычбек Жумалиев демөөрчүлүк кылат. Долбоордун жалпы баасы 375 миллион сомду түзөт", — деп айтылат маалыматта.
Жаңы борборду 2025-жылдын март айында пайдаланууга берүү пландалууда.