Көлдөгү Көк-Мойнок айылынын жанында “Росатомдун” шамал электр станциясынын курулушуна капсула салынды. Иш-чарага министрлер кабинетинин төрагасы Акылбек Жапаров жана Россия өкмөтүнүн төрагасынын орун басары Алексей Оверчук катышты. Инвестициялык долбоорду "Росатом Возобновляемая энергия" ачык акционердик коому ишке ашырмакчы. Министрлер кабинетинин башчысы Акылбек Жапаров мындай демилгелер Кыргызстандын жаратылышын сактоого чоң салым кошо турганын белгилеген. Сөз болуп жаткан шамал станциясынын кубаттуулугу 100 мегаватт болору айтылды. Ал жылына 280 миллион киловатт-саат электр энергиясын иштеп чыгарат. Жалпы аймагы 200 гектарды түзмөкчү.
Каникул учурунда шаардыктар "ээнирээк" көчөлөргө көнө түшкөн эле, эми жолдогу тыгындардан жүдөп жатышат. Бул тууралуу муниципалитеттин Транспорт департаментинин өкүлү Азамат Осмоналиев айткан. Ал сентябрдын этеги менен борбор калаада бардыгы өз ордуна келип калат деген пикирде. "Жайында баары эс алды, окуучулар каникулда болуп, жолдор бошураак болгонуна көнө түштүк. Окуу жылынын башталышы менен шаар жанданып, көптөр "шок" абалда болуп калышты. Адамдар буга көнүш үчүн бир-эки жумадай керек. Сентябрдын соңу менен жолдордун ремонтун бүткөрөбүз. Ошондо борбордук көчөлөрдүн жүгү жеңилдеп, бардыгы өз ордуна келет", — деген Осмоналиев. Мэриянын өкүлү мындай жагдайда окуучулар менен студенттердин ар башка убакта окууга барганы жакшы натыйжа берерин кошумчалаган.
Аялына өчөшүп кичинекей баласын урду деген 39 жаштагы киши Алайдан табылды. Бул тууралуу Ош облустук милициясы билдирди. Буга чейин болжол менен 4-5 жаштагы уулун уруп, аны "уйкум келип жатат" дегенине карабай караңгыда эшикке чыгарып жиберген кишинин видеосу тараган. Облустук милиция факт дароо эле Алай райондук ички иштер бөлүмүндө каттоого алынып, тергөөгө чейинки иштер башталганын кабарлады. Натыйжада окуяны видеого Алай районунун 39 жаштагы тургуну тартканы аныкталып, тергөөгө алып келинген. Алдын ала маалыматтарга караганда аталган жаран жубайы менен чатакташып, аны коркутуп коюу максатында ушундай аракеттерге барган. Учурда окуяга катыштыгы бар тараптар суралып, текшерүү уланууда. Милиция анын жыйынтыгы менен мыйзамдуу чечим кабыл алууну убадалады.
Америка "Түндүк агым — 2" газ куурунун жардырыларын билип, бирок аны токтоткон эмес. Бул туурасында Польшанын Тышкы иштер министри Радослав Сикорский пранкерлер менен сүйлөшүп жатканда айтып берип койгон. Видеону Sputnik Ближнее зарубежье Telegram каналы жарыялады Пранкчылар Владимир Кузнецов менен Алексей Столяров аны тамашага салган. Министр Украинанын мурдагы президенти Порошенко менен сүйлөшүп жатам деп ойлогон. "Польша буга мындайча мамиле кылабыз: аны ким жасаса да жакшы иш кылган. Америкалыктар бул туурасында эрте эле билип, бирок аны токтотпой койгонунан эми биздин кабарыбыз бар", — деген ал. Россиядан Европага газ ташылган "Түндүк агым" газ түтүктөрүндөгү жарылуу 2022-жылдын 26-сентябрында болгон. 2023-жылдын мартында Батыштын ЖМКларында диверсияны "Украинага ыктаган топ" жасаганы айтыла баштаган.