БИШКЕК, 12-сен. — Sputnik. Кыргыз-өзбек чек арасындагы "Кара-Суу" көзөмөл-өткөрүү пункту кайрадан ишке киргизилди. Бул тууралуу министрлер кабинетинин маалымат кызматынан билдиришти.
Кабарга ылайык, анын ачылышына катышкан суу ресурстары, айыл чарба жана кайра иштетүү өнөр жайы министри Бакыт Төрөбаев аталган жайдын кайрадан ишке кириши эки өлкө президенттеринин чечкиндүү саясий кадамдарынын негизинде аткарылганын айтты.
"Буга чейин көп убакыт кезекте туруп "Достук" пункту аркылуу өтүп келген Кыргызстандын жана Өзбекстандын жарандарынын бир бөлүгүнө "Кара-Суу" өткөрүү пункту аркылуу өтүүгө шарт түзүлөт. Өлкөлөр ортосундагы кызматташтыкты өнүктүрүүнүн негизги багыттарынын бири — бул эл аралык өткөрүү пунктуларынын ишин жандандыруу жана жарандардын мамлекеттик чек ара аркылуу өтүүсү үчүн жагымдуу шарттарды түзүү. Биздин көзөмөл-өткөрүү пунктун ачып жаткан бүгүнкү аракеттерибиз эки мамлекеттин ортосундагы экономикалык, социалдык, маданий байланыштарды тереңдетүүгө жана туристтик агымдарды кеңейтүүгө багытталган маанилүү кадамдардын бири болуп саналат", — деди Төрөбаев.
Белгилей кетсек, Ош жана Анжиян облусунда жайгашкан "Кара-Суу" өткөрүү пункту 14 жылдан кийин ишин жандантууда.