БИШКЕК, 12-сен. — Sputnik. Ондогон мамлекеттер БРИКСтин ишине катышууну каалайт. Бул тууралуу Россиянын президенти Владимир Путин бирикмеге мүчө өлкөлөрдүн жогорку өкүлдөрүнүн коопсуздук маселелери боюнча жыйынында билдиргенин Кремль кабарлады.
"Бүгүнкү күндө 34 өлкө тигил же бул формада биздин бирикменин ишмердүүлүгүнө кошулуу каалоосун билдирди", — деди Путин.
Ал белгилегендей, Россия БРИКСтин азыркы төрагасы катары биргелешкен иштерди уюштурууга жоопкерчиликтүү мамиле кылууда.
"Россиянын төрагалыгынын программасы абдан мазмундуу жана ар тараптуу экенин баса белгилегим келет. Ал бардык негизги тармактарда өнөктөштүктү өнүктүрүүгө багытталып, саясат, коопсуздук, экономика, каржы жана маданий-гуманитардык байланыштарды камтыйт", — деди президент.
Ал Москва жаңы мүчө өлкөлөрдүн БРИКСке тез интеграцияланышына көмөктөшөрүн белгиледи.
Эске салсак, БРИКСтин жылдык төрагалыгы Россияга 1-январда өткөн. Быйылкы жыл уюмга жаңы мүчөлөрдүн кошулуусу менен башталды. Учурда анын курамына Россия, Бразилия, Индия, Кытай жана Түштүк Африкадан тышкары Египет, Эфиопия, Иран, БАЭ жана Сауд Арабиясы кирет.