Кыргызстанда эки кишилик тик учактар чогултулуп, бешөө сыноодон өттү. Бул тууралуу президенттин маалымат кызматынын жетекчиси Дайыр Орунбеков билдирди. Ал Ысык-Көлдө VI Кыргыз-Россия экономикалык форумунун алкагында өтүп жаткан көргөзмөгө чыгарылган учактардын видеосу менен бөлүшүп, ошол жерде жүргөн кыргызстандык учкуч Союзбек Салиевдин пикирин билди. Тетиктер Польшадан алып келинип, Кыргызстанда чогултулууда. Тик учактар 70 литр май менен 600 чакырымды учуп өтө алат. Ылдамдыгы саатына 120-130 чакырымга жетери айтылды. "Булар кыска аралыкка учат, биздин тоолуу шартка ылайыкталган. Тик учактарды башкарууну каалагандар 72 саатта атайын программанын жардамы менен үйрөнүп алса болот", — деди Салиев. Ошондой эле лизингге алуу жолдору каралганы кошумчаланды.
Кыргыз-Россия экономикалык форумунда азырынча кызматташуу боюнча миллиард долларлык келишимдер түзүлдү. Бул туурасында Россия-Кыргыз өнүктүрүү фондунун башкаруучулугунун төрагасы Артем Новиков VI Кыргыз-Россия экономикалык ири иш-чарада билдирди. Анын айтымында, жети жыл мурда Кыргыз-Россия форуму кыргызстандык жана россиялык бизнесмендердин ортосундагы алака-катыш, байланыш түзүү ниети менен түзүлсө, бүгүн талкуу, делегация өкүлдөрүнүн саны, келишимдер боюнча бир топ жогорулады. Новиков бул форум жакынкы жылдары Санкт-Петербург экономикалык форуму, Шанхай кызматташтык уюмунун экономикалык форуму жана Дүйнөлүк экономикалык форум сыяктуу талкуу жүргүзгөн эң ири аянтчалардын катарына кирерине ишенерин айтты.
Дүйнөлүк көчмөндөр оюндарынын алкагында өткөн көкпардын финалы Казакстандын курама командасынын жеңиши менен аяктады. Негизги убакыт 4:4 эсеби менен аяктап, жеңүүчү кошумча убакытта аныкталды. Көкпардын эрежеси боюнча кошумча 10 мүнөт берилип, кайсы команда улакты озунуп салса, ошол жеңүүчү деп табылат. Натыйжада бешинчи улакты казак спортчулары салып кетти.
АКШнын президенттигине талапкерлердин дебаты Дональд Трамп жана Камала Харрис Украинадагы согуш боюнча Американын ролу кандай экенин так биле алышпай тургандыгын көрсөттү. Бул туурасында журналист Келли Влахостун айтканын РИА Новости жазды. "Трамп менен Харрис тышкы саясат боюнча так программасы жоктугун эле көрсөтпөстөн, тарыхты, факт, сандарды эби жок колдонуп айтып, кадимки эле пантомимага кирип кетишти. Украина жана Газа боюнча айткан пландары бүт дебатты баш-аягы жок кылып койду", — деген ал. Влахос эки талапкердин Украинадагы кырдаалды чечүү боюнча ыкмаларын сынга алган. Согушка чекит коем деген алкоого арзырлык аракети болгону менен Трамп Москва жана Киевдин тирешүүсүнүн чыныгы себебин көрүп, эске ала албагандыгын белгилеген. Журналисттин пикиринде, республикачыл талапкер татаалдашып кеткен саясий кырдаалды президент Жозеф Байден менен Харристин жеке өздөрүнүн алсыздыгы менен алмаштырып алды.