БИШКЕК, 11-сен. — Sputnik. АКШнын президенттигине талапкерлер Дональд Трамп менен Камала Харристин биринчи теледебаты ABC телеканалында болду.
Атаандаштар Украина темасын, Путиндин "колдоосун", Штаттардагы экономикалык жана миграция маселелерин талкуулашты. Сын жаадырып, кээ бир жерлерден кайсы бир маселеде бирин-бири күнөөлөп да жатышты.
Эгерде республикачыл Трамп жеңип калса чет элдик товарларга салмактуу бажы төлөмүн киргизе тургандыгын айтты.
Ал эми демократ Харрис президент болуп шайланып калса өлкөнүн нефть импортуна көз карандылыгын азайтып, "дүйнөдөгү эң каардуу армия түзөрүнө" убада берди.
"Чакан бизнеске жана жаңы үй-бүлөлөргө инвестиция салып, мүмкүнчүлүктөрдүн экономикасын түзүүнү көздөйм. Биз биргелешип Американын дүйнөдөгү абалын колдоп, татыктуу болгон сый-урматты камсыз кылууну жасай аларыбызга ишенем. Куралдуу күчтөргө болгон урмат-сыйды жана дүйнөдөгү эң күчтүү, кубаттуу согуштук күчкө ээ болушубузду камсыз кылуу максатым бар", — деген Харрис.
Трамп демократиялуу администрация АКШны үчүнчү согушка алып келерин айтты.
"Украинадагы согушка чекит коюп, кепке келип, макулдашуу өзүбүзгө эле жакшы", — деди ал Киевдин жеңиши АКШнын кызыкчылыгына жооп береби деген суроого.
Трамп дагы бир аягына чыкпай калган согуш темасын, АКШнын аскер күчүн Афганстандан алып чыгып кетиши боюнча пикирин айтты.
"Бул адамдар аскерлерди алып чыгып кетүү боюнча эң ийгиликсиз кадамды жасады. Менин пикиримде, бул биздин тарыхыбызда абдан маскара болгон учурубуз", — деген бүтүмүн билдирди.
Баса, бул дебатта Россия лидери Владимир Путин туурасында эки талапкер кеминде 12 ирет сөз кылышты.
Трамп тактыга отуруп калса Владимир Путин менен Владимир Зеленскийди сүйлөштүрөрүн айтты.
Ал эми экөөнүн бири-бирин айыптоосу тууралуу айтсак, Трамп жакында эле ага жасалган кол салууга күнөөлөдү.
"Окту булардын мен тууралуу айта бергенинен улам жедим. Демократия тууралуу айтышканда мен ошол демократиянын кооптуу адамы болуп чыга келдим, чындыгында анык коркунуч жараткандар — ушулар", — деди Трамп.
Ал эми Харрис да атаандашын күнөөлөй турчу себеп тапкан.
"Дональд Трамп президент болуп турганда Кытайга америкалык чиптерди сата баштады. Бул алардын Куралдуу күчтөрүн жакшыртып, модернизациялоого жардам берүү үчүн болду. Негизи, ал бизди сатты", — деди Харрис.
Бул сөз таймаштын соңунда Харристин шайлоо штабы октябрда дебаттын экинчи раундун өткөрүүгө даяр экендигин жар салды.
Трамп бул сунушка азырынча жооп бере элек. Анткен менен бул сөз таймашы карьерасындагы "сонун" дебат болгонун, талаш-тартыштарга "бирөөгө каршы үчөө чыкканын" белгиледи. Саясатчы бул кечтеги сөзү башкалардын пикиринде "ири жеңиштен" кабар берген маанилүү фактор болуп саналарын кошумчалады.