Президент Садыр Жапаров Россиянын Кыргызстандагы жаңы элчиси Сергей Вакуновду кабыл алды. Бул тууралуу мамлекет башчынын маалымат кызматынан билдиришти.Жапаров элчинин ишеним грамоталарын кабыл алып, өлкөнүн дипломатиялык миссиясынын башталышы менен куттуктады.Жолугушуунун жүрүшүндө эки тараптуу кызматташтыктын актуалдуу маселелери боюнча пикир алмашуу болду. Ошондой эле эки өлкөнүн өкмөттөрү ырааттуу иштеп, Кыргызстанда тогуз мектептин курулушу боюнча тиешелүү иштер жүргүзүлүп жатканы, Ысык-Көлдө быйыл өзүнүн 10 жылдык мааракесин белгилеп жаткан Кыргыз-Россия өнүктүрүү фонду тарабынан уюштурулган Кыргыз — Россия экономикалык форуму ишин баштаары белгиленди.Өз кезегинде Вакунов мамлекет башчыга Россия менен кызматташуунун бардык багыттары боюнча позициясы үчүн ыраазычылык билдирип, эки өлкөнүн алакасын мындан ары тереңдетүү үчүн бардык күч-аракеттерди жумшоого ниеттенип жаткандыгын билдирди.
Сокулук районунда 9-класстын окуучусунун өлүмү боюнча Билим берүү министрлиги үн катты.Эске салсак, өспүрүмдүн көз жумганы боюнча маалымат милицияга 5-сентябрда түшкөн. Факт электрондук журналга катталып, текшерүүнүн жүрүшүндө Сокулук райондук милициясына көз жумган баланын классташтары сурак беришкен. Кылмышка шектелип 16 жаштагы бала кармалган.Ведомство окуя сабактан тышкаркы убакта, балдар мектептен чыккандан кийин болгонун кабарлады.Ведомство "Билим берүү жөнүндө" мыйзамдын 40-беренесинин 4-пунктуна ылайык, бала билим берүү уюмунун аймагынан, окуу убактысынан тышкары болгондо алардын ден соолугу, өмүрү үчүн ата-эне жооптуу экенин эске салды.Бул окуядан кийин кылмышка шектелип балдарды чогулткан 16 жаштагы Б.С. кармалып, Сокулук ИИБдин убактылуу кармоочу жайына киргизилген.
Кыргызстандын жер улак боюнча командасы V Дүйнөлүк көчмөндөр оюндарынын финалына чыкты. Команда Түркиянын командасын 15:1 эсебинде жеңип, өз тобундагы максималдуу упайды камсыздай алды. Кыргыз улакчылары буга чейин Монголияны дагы ири эсеп менен жеңген.Финалда кыргыз курама командасы 11-сентябрдагы Казакстан — Россия беттешинин жеңүүчүсүнө туш келет. Алтын медаль үчүн оюн 12-сентябрда өтөт.
Президент Владимир Путин Нью-Йорктогу БУУнун Башкы Ассамблеясынын жыйынына барбайт, себеби АКШ учурда Россия лидери бара турган тарап эмес. Бул туурасында мамлекет башчынын маалымат катчысы Дмитрий Песков айтканын РИА Новости жазды. Кремль өкүлү Путин эмнеге Бириккен Улуттар Уюмунун Башкы Ассамблеясынын жыйынында чыгып сүйлөбөөнү чечти деген суроого жогорудагыдай кылып жооп берген.Президент буга чейин 22-23-сентябрда Нью-Йоркто өтө турган БУУнун 79-сессиясына Россиянын он кишиден турган делегациясынын курамын бекиткен. Топту тышкы иштер министри Сергей Лавров жетектеп бармакчы. Москва америкалык визалардын берилишинде чыккан көйгөй боюнча бир нече жолу маселе көтөргөн. Бул нерсе биринчи иретте БУУга жөнөтүлгөн дипломаттарга тиешелүү болуп жатканын жана мындан улам Арбитраждык сотко кайрылуу зарылдыгы айтылган. 2023-жылдын март айынын аягында РФтин уюмдагы туруктуу өкүлүнүн биринчи орун басары Дмитрий Полянский РИА Новостиге Россия уюмдун баш катчысы тарабынан процедуранын жакын арада ишке киргизилерине үмүттөнөрүн айткан эле.