Өлкө башчы Садыр Жапаров Казакстанда өтчү V Көчмөндөр оюндарынын ачылыш аземине катышат. Бул тууралуу президенттик администрациянын тышкы саясат бөлүмүнүн башчысы Муратбек Азымбакиев билдирди. Маалыматка ылайык, Жапаров эртең, 8-сентябрда, Астанада болот. Оюндар Казакстандын борборунда 9-12-сентябрь аралыгында өтөт. Иш-чарага 80ден ашуун өлкөдөн 3000ден ашык спортчу катышат. Кыргызстан Дүйнөлүк көчмөндөр оюндарынын демилгечиси болуп саналат. Оюндар үч ирет Кыргызстанда, төртүнчүсү Түркияда өткөн. Эми бешинчиси Казакстанда болгону турат. Ал эми аталган оюндар 2026-жылы Өзбекстанда өтөру айтылган.
Министрлер кабинетинин төрагасы Акылбек Жапаров коомдук башталыштагы бардык жардамчы, кеңешчилерин иштен бошотту. Бул тууралуу өкмөттүн маалымат кызматы билдирди. Кабарлангандай, Акылбек Жапаров тиешелүү буйрукка кол койгон. Мындай чечим Президенттик администрацияны реформалоо жана башкаруу системасын жакшыртуунун алкагында кабыл алынган. Буга чейин 5-сентябрда президент Садыр Жапаров да коомдук башталыштагы жардамчылары менен кеңешчилерин бошоткон.
Кыргызстандан үчүнчү өлкөлөргө ири мүйүздүү, майда мүйүздүү малды жана жылкыларды экспорттоо убактылуу токтотулду. Бул тууралуу Суу ресурстары, айыл чарба жана кайра иштетүү өнөр жайы министрлигинен кабарлашты. Чектөө «СИОЖ» системасында айыл чарба жаныбарларын идентификациялоого инвентаризация жүргүзүүгө байланыштуу экени айтылды. Мындай чара өлкөдөгү малдын так эсебин камсыз кылууга, ошондой эле ветеринардык жана санитардык нормалардын сакталышына контролду жогорулатууга багытталган. Инвентаризация 15-20 күнгө созулат, андан кийин экспортко уруксат берүү процесси улантылат.
Ысык-Ата шаардык санитардык-эпидемиологиялык көзөмөл башкармалыгынын башкы дарыгери пара талап кылууга шектелип кармалды. Бул тууралуу Чүй облустук ИИБ билдирди. Милиция башкы дарыгерге карата Ново-Покровка айылындагы кафелердин бирин ижарага алып иштеткен адамдан арыз түшкөнүн билдирди. Ишкер аны “кафени текшеребиз, айына 10 миң сомдон төлөйсүң” деп коркутуп жатышканын айткан. Факты боюнча "опузалап пара талап кылуу" беренеси боюнча иш козголду. Башкы дарыгер менен айдоочусу пара алып жаткан жеринен кармалган. Дарыгер убактылуу кармоочу жайга киргизилди.
Украинада Россия менен кызматташкан деп 1,5 миңдей киши соттолгонун РИА Новости Times газетасына шилтеме берип жазды. "Украинанын прокуратурасы атайын операция башталгандан бери 8 миңден ашуун кылмыш ишин козгоду. Болжол менен 1,5 миңдей киши Россия менен кызматташкан деп абактарда жатат", — деп айтылат маалыматта. Басылманын кызматкерлери түрмөдөгүлөр менен сүйлөшкөн. Дээрлик бардыгы Россия менен Украинанын ортосунда туткундарды алмашуу программасына катышууну көздөй турганын айтышкан. Бул ишке айыпталган украиналыктар башкаларга кошулбай атайын абактарда отура турганы да айтылган. Украинада мамлекеттик чыккынчылыкка айыпталгандар 15 жылга чейин кесилет же мүлкүн конфискациялоо менен өмүр бою эркинен ажыратылат. Ал эми "Кызматташуу" каралган жазада 170 миң гривенге чейин айып пул салып, үч жылдан беш жылга чейин эркинен ажыратышат.