БИШКЕК, 6-сен. — Sputnik. Telegram платформасынын негиздөөчүсү Павел Дуров Францияда кармалганы боюнча билдирүүсүн жарыялады.
"Өткөн айда Парижге келгенден кийин полиция мени төрт күн суракка алды. Башка адамдардын Telegram мессенжерин мыйзамсыз колдонгону үчүн жеке мен жоопкер болорумду айтышты. Бул бир нече себептен алганда таң калычтуу нерсе", — деп жазган ал.
Дуров жеке өзү мурда эле өлкөдө террорчулукка каршы күрөштө Telegram менен Париждин ортосунда түз байланышты (ишеним телефонун) түзүүгө жардам бергенин белгиледи. Анын айтымында, кайсы бир мамлекет интернет-сервиске нааразы болсо платформанын ээсин эмес, сервистин өзүн сотко бериши керек.
"Смартфон чыга электеги мыйзамдарды колдонуу, платформада үчүнчү (башка) кишилер жасаган кылмыш үчүн башкы директордун артынан сая түшүп алуу, куугунтуктоо — туура эмес ыкма", — деп сөзүн жыйынтыктаган ишкер.
Telegram мессенжеринин негиздөөчүсү Павел Дуров 2024-жылдын 24-августунда Париждин Ле Бурже аэропортунда кармалган. Франциянын прокуратурасы 28-августта билдиргендей, ишкер тергөө абагына киргизилген эмес, бирок ага республиканын аймагынан чыгууга тыюу салынган жана беш миллион евро күрөө төлөө милдеттендирилген.
Дуров 10 эреже бузууга жана бир нече кылмыштарга айыпталууда. Анын ичинде уюшкан топ тарабынан мыйзамсыз транзакцияларды жүргүзүү максатында онлайн-платформаны башкарууга шериктеш болду деген кине бар. Ишкер 10 жылга чейин эркинен ажыратылышы мүмкүн.
Европалык ЖМКлар Telegram иши боюнча тиркеменин негиздөөчүсүнүн бир тууганы Николай Дуров да өтүп жатканын жазышкан.
Россиянын президенти Владимир Путин Дуровдун кармалышына комментарий берип, Франция бийлигинин кадамы таптакыр түшүнүксүз жана тандалмалуу мүнөздө экенин белгилеген.