БИШКЕК, 6-сен. — Sputnik. АКШ президенти Жозеф Байдендин баласы Хантер Байден салык кылмыштары боюнча тагылган айыптын ар бир пунктун мойнуна алганын РИА Новости NBC News телеканалына таянып жазды.
"Хантер Байден федералдык салык боюнча ага тагылган бардык күнөөлөрдү моюндады",— деп айтылган маалыматта.
Президенттин 54 жаштагы баласына өкүм чыгаруу 16-декабрга дайындалган.
Бейшемби күнү Хантер Байдендин жактоочулары ал сотто тергөө менен кызматташарын (келишимин түзүүгө ниети бардыгын), бул коюлган олуттуу күнөөлөрдү моюнга алууга болорун, анткен менен ал салык төлөөдөн качты дегенге кошулбай турганын айткан.
Буга чейин Делавэр штатынын соту Хантер Байденди курал сактоо боюнча мыйзам бузуулар боюнча айыпталган бардык беренелер менен күнөөлүү деп тапкан. Прокуратуранын маалыматына таянсак, анын баңгизат пайдалангандыгы тапанча сатып алуу укугунан ажыраткан. Сурак учурунда калп айтканы жана куралды 2018-жылдын октябрында алганы, андан соң тыюу салынган заттарды колдонгон учурунда деле тапанчага ээлик кылып жүргөнү айтылды.
Байден 25 жылга чейин эркинен ажыратылып, 750 миң доллар айыпка жыгылышы мүмкүн. Бирок мындай иш менен биринчи ирет күнөөлөнүп жаткандарга эркинен ажыратуу практикасы колдонулбайт.
Ал эми анын атасы, америкалык лидер Жозеф Байден мындан кийин сот арачылардын чечимин кабыл аларын жана юридикалык системаны урматтай турганын айтты.