Кыргызстан "Талибанды"* террордук уюмдардын тизмесинен чыгарды. Бул тууралуу бизге мамлекеттик структурадагы маалымат булактар кабарлады. Өткөндө Башкы прокуратура жарыялаган тыюу салынган уюмдардын тизмесинде талибдер кыймылы жок болуп чыккан. Ага утурлай эле Кабул Бишкектин чечимин кубаттай турганын жар салган. Буга чейин Казакстан талибдерди тыюу салынган уюмдардын тизмесинен чыгарган.
Министрлер кабинетинин төрагасы Акылбек Жапаров Дүйнөлүк көчмөндөр оюндарына катыша турган Кыргызстандын улуттук курама командасын Астанага узатты.Аталган спорттук-маданий иш-чара 8-сентябрдан 14-сентябрга чейин өтөт. "Дүйнөлүк көчмөндөр оюндарын биринчилерден болуп уюштурганыбызды сыймыктануу менен айткым келет. Англиялыктар өз өлкөсүн футболдун, канадалыктар хоккейдин мекени деп айткандай, бул оюндардын автору экенибизди сыймыктануу менен айта алабыз. Бул факт биздин спортчуларга өзгөчө жоопкерчиликти жүктөйт", — деди Жапаров. Министрлер кабинетинин төрагасы курама команданын капитаны балбан Бактияр Мирлан уулуна мамлекеттик тууну тапшырып, спортчуларга ийгилик каалады.
Монополияга каршы жөнгө салуу кызматы эттин кымбатташына таасир эткен факторлорду санады. Мекеме 7-августтан 5-сентябрга чейин уй этинин баасы 5,3 пайызга өскөнүн, тагыраагы, 544 сомдон 573 сомго чейин кымбаттаганын белгиледи. "Сатуучулар баанын кымбатташын малдын жана эттин кошуна өлкөлөргө экспорттолуп жатышы менен байланыштырды. Бул ички рынокто тартыштык жаратууда. Ошондой эле баага сезондук факторлор да таасир этиши мүмкүн. Фермердин көбү малын бордоп семиртүүгө жиберип, ошондуктан союла турчу мал аз болууда. Ошондой эле күзүндө той-аш да көп болуп, этке, өзгөчө уй, кой этине суроо-талап өсөт", — деп айтылат маалыматта. Эске салсак, соңку убакта эт кымбаттап кеткени айтыла баштаган. Монополияга каршы жөнгө салуу кызматынын төрагасынын орун басары Женалы Орозбаев да эттин кымбаттаганын тастыктап, бирок бааны "мамлекеттик жөнгө салууга негиз жок" экенин айткан. Ал эми Айыл чарба министрлиги "кооптонууга негиз жок экендигин" белгилеген.
Бишкектеги Кыргыз-түрк ооруканасына Түркиянын президенти Режеп Тайип Эрдогандын ысымы берилди. Тиешелүү жарлыкка мамлекет башчы Садыр Жапаров кол койгон. Мындан ары медициналык борбор Режеп Тайип Эрдоган атындагы Бишкек Кыргыз-түрк достугу мамлекеттик ооруканасы деп аталат. Медициналык борбор Түркиянын каражатына курулуп, 2021-жылы расмий ачылган. Анткен менен ал 2017-жылдын ноябрь айында эле курулган. Бирок үч жылдан ашык убакыт бою иштебей туруп, 2020-жылы Түркия оорукананы COVID-19 менен жабыркагандарды дарылоо үчүн Саламаттык сактоо министрлигине өткөрүп берген. Оорукана калкка медициналык кызмат көрсөтүүдөн тышкары, илимий иштерди да жүргүзөт. Ошондой эле бул борбордо өлкөдөгү алгачкы трансплантология жасалган. Медициналык жайдын түзүмү төмөнкүлөрдү камтыйт: медициналык тез жардам кызматы, анестезия бөлүмү, терапевттик бөлүм, гастроэнтерология, жалпы хирургия, пульмонология, жүрөк-кан тамыр хирургиясы, кардиология бөлүмдөрү, мындан башка бейтапкана жана радиология бөлүмү бар.