БИШКЕК, 3-сен. — Sputnik. Германия "Түндүк агым" боюнча жардырууларды изилдөөдө украиналык диверсанттардын аталган кылмышка тиешеси бар деген жагдайлардан кийин Киев өкмөтүнөн үмүт артып, жардам берет деген ниетте. Бул туурасында ГФРдин министрлер кабинетинин өкүлү Кристиан Хоффманндын айтканын РИА Новости жазды.
"Ооба", — деген ал журналисттердин "Берлин Владимир Зеленскийдин өкмөтү "Түндүк агым" боюнча диверсияларды изилдөөдө жардам берет деген ойдо турабы" деген суроосуна жооп берип жатып.
Хоффманн бул жооп Германия өкмөтүнө эмес, иликтөөнү жүргүзүп жаткан Башкы прокуратурага тиешелүү экенин белгилеген.
Буга чейин ЖМКлар аталган өлкөнүн көзөмөлдөө органы газ куурларын жардыруу боюнча украиналык Владимир Ж. аттуу кишини камоо үчүн ордер сураганын жазган.
Немец басылмаларынын маалыматы боюнча, түтүктөрдү жардыруу үчүн "Андромеда" парустук яхтасы колдонулган. Кемени 2016-жылы негизделип эки украиналык жаранга катталган польшалык Feeria Lwowa компаниясы ижарага алган. Бул боюнча Германия прокуратурасы дайвинг боюнча инструкторду камакка алууну чечкен. Ал диверсия жасаган топту ташыган автоунаанын айдоочусу болгон деп шектелүүдө.
Басылмалардын бири инструктордун сүрөтүн жарыялап, бул украиналык Владимир Журавлев аттуу дайвер тууралуу сөз болуп жатканын аныктоого жардам берген. Мындан тышкары, ага Светлана жана Евгений Успенскийлер шерик болгону айтылды.
Wall Street Journal гезити билдиргендей, немецтик изилдөөнүн көңүл чордонунда Украинанын Куралдуу күчтөрүнүн мурдагы башкы командачысы Валерий Залужный турат. Басылма ЦРУ Зеленскийден түтүктөрдү жардырбай турууну талап кылып, бирок Залужный өзү билемдик кылганын жазды.
Россиянын Башкы прокуратурасы эл аралык террордук акт боюнча ишти демилгелеген. Кремлдин расмий өкүлү "Түндүк агымдын" жардыруулары боюнча маалыматты бир нече ирет сурап, бирок бир да жолу жооп албаганын айткан.