БИШКЕК, 2-сен. — Sputnik. Москва Борбор Азия өлкөлөрү менен улуттук валютада эсептешүүнү жолго коюу үчүн иш алып барууда. Бул тууралуу Россия ТИМинин Экономикалык кызматташуу департаментинин директору Дмитрий Биричевскийге шилтеме кылып РИА Новости жазды.
Анын айтымында, "Мир" төлөм системасын жакшыртуу боюнча иштер тынымсыз жүргүзүлүүдө.
Буга чейин РФ ТИМ башчысынын орун басары Михаил Галузин 2023-жылы Россия менен Борбор Азиянын ортосундагы соода жүгүртүү 44 миллиард доллардан ашканын айткан. Ал аймактын тышкы соодасынын 33 пайызы Россияга туура келерин, төлөмдөр негизинен улуттук валютада жүргүзүлөрүн белгиледи.
Биричевский чөлкөмдөгү мамлекеттер Россиянын башка өнөктөштөрүндөй эле Батыштын саясий кысымына кабылып жатканына токтолгон.
"Вашингтон жана анын европалык "жугундукорлору" коркутуп-үркүтүү, опуза аркылуу өнөктөштөрүбүзгө Россия менен экономикалык байланыштарды үзүүгө же кызматташууну минималдаштырууга мажбурлашууда. "Кыйыр" санкция коркунучуна карабастан биздин алакалар талаптагыдай деңгээлде кармалып турат", — деди ал.
Биричевский буга соода жүгүртүүнүн статистикасы күбө экенин, ал былтыр 40 миллиард доллардан ашканын айтты.
"Ак ниет кызматташуу жана эки тараптуу экономикалык алакалардын негизинде биздин мамилелер жакшыра берерине ишенем", — деген дипломат.
Россия Батыштын улам күчөп жаткан санкциялык кысымына туруштук берерин айтып келет. Москва РФке каршы санкциялык саясат өзүн актабай жатканын Батыштагылардын моюнга алууга эрки жетпей жатканын белгилөөдө. Анткени Батышта да мындай пикирилер байма-бай айтылууда.
Россияны ооздуктоо жана алсыздандыруу саясаты Батыштын узак мөөнөттүү стратегиясы экенин, санкциялар дүйнөлүк экономикага олуттуу сокку урганын РФ президенти Владимир Путин да айтып келет.