Казакстанда өтө турган Дүйнөлүк көчмөндөр оюндарына даярданууга бюджеттен 50 миллион сомдон ашык каражат бөлүнгөн. Бул тууралуу Артур Геворгян Sputnik Кыргызстан радиосуна маек куруп жатып билдирди.
Анын айтымында, бөлүнгөн акчанын 8 миллион сому курама команданын спорттук кийимине жумшалса, спортчулардын окуу-машыгууларына 16 миллион кетти.
"Казакстанда өтө турган Дүйнөлүк көчмөндөр оюндарына 20 спорттун түрүнөн спортчулар катышат. Жалпы делегациянын курамы 288 кишиден турса, анын 180дейи спортчулар. Калгандары: медициналык персонал, машыктыруучулар, калыстар, расмий өкүлдөр. Алдыда өтө турган ири иш-чарага өлкө спортчулары жогорку даярдыкта барышат. Жыл башында Дүйнөлүк көчмөндөр оюндарына даярданууга бюджеттен 50 миллион сомдон ашык каражат бөлүнгөн. Акчанын 8 миллион сому курама команданын спорттук кийимине жумшалса, спортчулардын окуу-машыгууларына 16 миллион сом кетти. Мындан тышкары, көк бөрү, көкпарга жана жаныбар, канаттууларды жеткирүүгө 9 миллион сом каралган", — деди Геворгян.
Ал Астанадагы Көчмөндөр оюндарында Кыргызстан командалык эсепте 1-орунду алуу үчүн бардык күчүн жумшай турганын кошумчалады.