Мамлкекет башчы Садыр Жапаров кыргызстандыктарды Билим күнү менен куттуктады. Өлкө башчы сөзүндө билим гана адамды эркин жана бийик кыларын белгиледи. "Урматтуу окуучулар жана студенттер! Үйдөн адептүү болууга татыктуу тарбия, мектептен ар тараптуу терең билим алсаңар Кыргызстандын атагын чыгарып, туубузду бийик желбирете турган ийгиликтерге жетесиңер. "Билим гана адамды эркин жана бийик кылат" деген жакшы сөз бар. Мектеп босогосун аттап жаткан жеткинчектердин сапары байсалдуу болсун. Жалпы окуучу, студенттер окуу жылына жаңы дем, жаңы жигер менен кирсин. Агай-эжейлерибизге чыгармачылык ийгиликтерди каалайм", - деген президент. Ал ошондой эле республика аймактарында бардык шарттары бар заманбап мектептер курулуп, четинен ишке берилип жатканын белгиледи. Ошондой эле өлкө тарыхында биринчи жолу мугалимдер үчүн ноутбук сатып алууга каражат бөлүнгонун, биринчи этапта алар STEM предметтеринин мугалимдерине андан кийин бардык мугалимдерге берилерин кошумчалады.
Бишкекте жогорку окуу жайларында, кесиптик лицей, колледждерде сабак саат 10:00дөн эрте башталбайт. Бул токтомго Акылбек Жапаров кол коюп, маалыматты министрлер кабинети тастыктаган. Мындай чечим шаардагы жол тыгынын азайтуу максатында кабыл алынган. Андан тышкары, Бишкек мэриясы жаңы окуу жылында сабактар танкы 07:30дан тарта баштала турган мектептердин тизмесин берген. Буга чейин №69, 29, 70, 61, 9, 13, 95, 102, 4, 23, 33, 38, 43, 67 мектептер жогоруда айтылган убакытта окуп келишсе, эми аларга 30 мектеп кошулган.
Бүгүн Бишкектеги Жал кичи районунда "Муун" гүл бакчасы ачылды. Анын ачылыш аземине Бишкек шаарынын мэри Айбек Жунушалиев, Архитектура, курулуш жана турак жай-коммуналдык чарба мамлекеттик агенттигинин директору Нурдан Орунтаев, демөөрчү болгон курулуш компаниялардын өкүлдөрү жана шаар тургундары катышты. Жаңы курулган гүл бакчада балдар аянтчасы, чуркоо тилкеси бар. Ошондой эле эс алуучу аймак жашылдандырылып, жарыктандырылды. Мындан тышкары, гүл бакчага чүкө ойноп жаткан калпакчан баланын турпатын чагылдырган стелла орнотулду. Иш-чарада борбор калаанын башчысы Айбек Жунушалиев шаар тургундары үчүн бардык шарттары бар эс алуу зоналарын куруу улантыларын айтты. "Сиздерге маалым болгондой, Бишкек шаарына жаңы айыл аймактар кошулду. Биз борбор калаабызды өнүктүрүү үчүн ишке ашыра турган пландарыбыз бар. Аларды 2-3 жылдын ичинде толук аткарабыз деп ойлойм. Бардыгыңыздарды Эгемендүүлүк күнү жана бүгүнкү Билим күнү менен куттуктайм", - деди ал. Курулушка жалпысынан 20 млн сом жумшалганы айтылды.
Газа секторунда атышууну токтотуу боюнча сүйлөшүүлөрдү жүргүзгөн тараптар бир келишимге келүү боюнча принципиалдуу макулдашууларга жетишишти. Бул тууралуу АКШ президенти Жо Байден ишембиде журналисттерге билдиргенин РИА Новости жазды. Байдендин айтымында, тараптар учурда келишим түзүүнүн босогосунда турушат."Биз бир келишимге келүүгө жакындап калдык деп ойлойбуз. Алардын баары принциптерге макул экенин билдиришти", – деген Байден. Ал ошондой эле сүйлөшүүлөрдүн бул этабындагы жылыштарга оң баа берерин кошумчалаган.