БИШКЕК, 29-авг. — Sputnik. Евробиримдик өлкөлөрүнүн ТИМ башчыларынын бейрасмий жыйыны Венгриянын жалпы европалык саясатка каршы келген позициясынан улам Будапештте эмес, Брюсселде өтмөй болду. Бул тууралуу ЕБ дипломатиясынын жетекчиси Жозеп Боррель билдиргенин РИА Новости жазды.
"Будапешт чыр күчөп кетет деп Россиянын аймагына ыраакка атылуучу курал менен сокку урууга каршы чыгууда. Венгр тарап Брюсселде өтө турган ТИМ жана Коргоо министрлигинин башчыларынын жыйынында тынчтыкка келүү позициясынан кайтпайт", — деди Венгриянын тышкы иштер жана тышкы экономикалык байланыштар министри Петер Сийярто.
Анын айтымында, эгер Украинада курал-жарак көбөйүп, Россияга сокку урула турган болсо чыр-чатак ырбап, согуш кооптуулугу эселеп күчөп кетет.
Евробиримдикте азыр Венгрия төрагалык кылууда, ТИМ башчыларынын бейрасмий жолугушуусу да Будапештте өтүшү керек эле. Бирок Боррель Венгрия өкмөтүнүн бир катар позициясы ЕБдин жалпы саясатына каршы келгендиктен жыйынды Брюсселде өткөрүү максатка ылайык экенин билдирген.
Киевге аскерий жардамды күчөтүүгө ыктаган ЕБ дипломатиясынын башчысы тынчтык орнотууга аракет кылган Венгрияны көп ирет сындап, Будапешт ушу кезге чейин Киевге курал жөнөткөн европалык мамлекеттерге компенсация иретинде 6 миллиард евро бөлүүгө макулдугун бере электигин эске салып келет.
Сийярто өз кезегинде Брюсселде деле тынчтык орнотуу позициясынан тайбай турганын белгиледи.
Венгрия ТИМинин башчысы украиналыктардын күчтөп мобилизациялоо кадрларын зордук-зомбулук деп атаган. Анын айтымында, согушка жөнөтүлгөндөрдүн көбүн өлүм күтүп жатат. Ал мындай "акылга сыйбаган аракеттерди" токтотууга чакырган.
Эскерте кетсек, бүгүн Боррель ЕБ мамлекеттерин Россияга сокку урууга уруксат берүүсүн өтүндү.
Ал эми РФ ТИМинин башчысы Сергей Лавров Киев тарабынан Storm Shadow ракеталары менен Россияга тереңирээк сокку урулушун "от менен ойноого" салыштырган. Министрдин айтымында, Украина үчүн курал-жарак жүктөлгөн транспорттун бардык түрү РФ армиясынын мыйзамдуу бутасына айланат.