БИШКЕК, 29-авг. — Sputnik. Борбор калаадагы "Дордой" базарында ири кагаз кутуларга салынып даярдалган эндиктин тамырынын 1,5 миң тоннадан ашыгыраак партиясын табышты. Бул туурасында Жаратылыш ресурстары, экология жана техникалык көзөмөл министрлигинин маалымат кызматы билдирди.
Операцияны өсүмдүктөр дүйнөсүн жок кылуу жана аны чет жактарга ташып кетүү иштерин токтотуу максатында ИИМ менен аталган министрлик жүргүзгөн.
Эске салсак, министрлер кабинетинин "Өсүмдүктөр дүйнөсүнүн айрым түрлөрүн пайдаланууга убактылуу тыюу (мораторий) салуу жөнүндө" токтому кабыл алынган. Документте элдик медицинада дарылыгы бар деп эсептелген беш чөптү чогултууга болбой турганы айтылган. Алар арнебия, макротония, башкача айтканда, эндиктин эки түрү, ясенец (эл беш жылдыз дешет), афлатун пиязы, уу коргошун. Тыюу үч жылга салынган.
Бул чөптөр элдик медицинада дары катары колдонулгандыктан коммерциялык максатта өтө көп өлчөмдө терип саткандар арбып, жок болуп кетүү коркунучуна кептелген. Аталган өсүмдүктөрдү жергиликтүү калк коммерциялык эмес максатта эки килограммга чейин чогулта алат.
Бирок акыркы жылдагы маалыматтарга таянсак, афлатун пиязы 229 000 килограмм, ясенец 378 000, уу коргошун 69 600, эндик 99 500 килограммга чукул казылып кеткен. Министрлик мындай көрүнүш Кыргызстандын экологиялык системасына зыян алып келерин айтты.