БИШКЕК, 28-авг. — Sputnik. Ушул жылдын жети ай аралыгында "Тазалык" муниципалдык ишканасы Бишкектин аймагынан 156 290 тонна таштанды чыгарды. Бул тууралуу ишкана директору Жолдош Чуштуков докладында айтканын мэриянын маалымат кызматы билдирди.
Үстүбүздөгү жылдын жети айында чыгарылган таштандынын көлөмү өткөн жылдын тиешелүү мезгилине салыштырмалуу 38 589 тоннага, ал эми 2022-жылдагыдан 50 тоннага көп.
Жолдош Чуштуков атайын техниканын жоктугунан ишкана шаардык муниципалдык кызматтардын техникаларын колдонуп жатканын белгилеген.
"Атайын жабдууларды алуу боюнча келишимдер түзүлгөн. Участокторду толук камтуу үчүн зарыл болгон таштанды ташуучу унаалардын келиши жакынкы аралыкка пландалды. Ошондой эле ишканага жүктөгүч, шыпыргыч, айдоочу, слесарь, ширетүүчүлөр жетишпейт", — деген ал.
Маалыматта айтылгандай, жумушка орношууну каалагандар Бишкек шаары, Ростовская көчөсү, 19Б дарегине кайрылышса болот.
Шаардык мэрия жашоочуларды таштандыны саат 19:00дөн 00:00гө чейин чыгарууга чакырган. Ишкананын жумушчулары таштандыны таңкы саат 06:00гө чейин тазалашат.