БИШКЕК, 28-авг. — Sputnik. Бишкектеги бейтапканалардын биринде эркек киши аутист баланы муштап жиберди. Окуянын видеосу соцтармактарга тарады.
Кадрдан бала клиникадагы отургучта дарыгерге кайрылуу үчүн кезек күтүп отурганын көрүүгө болот. Бир маалда анын жанындагы киши муштуму менен ийнине бир койгон.
Жабырлануучунун эжесинин айтымында, бала кишинин сумкасын кармалап койгону үчүн муш жеген.
Бишкек шаарынын Ленин райондук ички иштер башкармалыгы 27-август күнү милицияга Ж.А. аттуу жаран кайрылганын билдирди. Ал өзүнүн жашы жете элек бир тууганы М.А. менен Фучик көчөсүндөгү клиникалардын биринде дарыгерге кезек күтүп турган учурда бейтааныш киши инисине кол көтөргөнүн билдирген.
"Бул факт маалымат журналына катталып, тергөөгө чейинки текшерүү иштери башталды. Керектүү экспертизалар дайындалган. Учурда тергөө иш-чаралары жүргүзүлүп, анын жыйынтыгы менен процессуалдык чечим чыгарылат", — деди ИИБ.