БИШКЕК, 27-авг. — Sputnik. Маданият, маалымат, спорт жана жаштар иши министрлиги интернетте жана ЖМКларда фейк, ошондой эле бурмаланган маалымат тараткандарды жазалоо боюнча мыйзам долбоорун даярдап, коомдук талкууга чыгарды. Мында Бузуулар кодексине толуктоо киргизилмекчи.
Жалган же бурмаланган маалымат тараткандыгы үчүн жеке жактарга 100 миң сом, юридикалык жактарга 200 миң сом айып салуу сунушталууда.
Долбоордун маанилүү жерлери:
мыйзам долбоору коомдук кызыкчылыктарды, жарандардын укугу менен эркиндигин коргоо, маалыматтык коопсуздукту камсыздоо үчүн зарыл;
туура эмес маалымат дүрбөлөңгө салып, башаламандык жаратып, коомдук тартипти бузушу мүмкүн;
жалган маалымат коомдук пикирди манипуляциялап, шайлоого таасир этет, талапкерлерди, партияларды же мамлекеттик органдардын беделин кетирүүсү мүмкүн;
жалган маалыматтарды алдамчылар пайдаланышат.
Мыйзам долбоорунда ЖМК жаатындагы ыйгарым укуктуу органды эреже бузган тарапты айыпка жыгып, акча өндүрүүгө милдеттендирүү сунушталган.
Эскерте кетсек, августтун башында министрлер кабинети Жогорку Кеңешке интернетте, ЖМК жана соцтармакта жалаа жаап, адамдын беделин түшүргөн аракеттер үчүн ири суммадагы айып салуу каралган мыйзам долбоорун киргизген. Бийлик Бузуулар кодексин дагы бир берене менен толуктоону сунуштаган. Анда ЖМК же интернетте адамдын беделине шек келтирсе 100 миң сом өлчөмүндө айып салуу (юридикалык жактарга 200 миң сом) каралган. Ушундай көлөмдөгү айыпка ЖМК же интернет аркылуу жалаа жапкан тараптар да жыгылат.
Бир нече күндөн кийин министрлер кабинетинин төрагасынын орун басары Эдил Байсалов мыйзамга социалдык тармактагы фейк жана бурмаланган маалымат жайылткандар менен күрөшүүгө багытталган өзгөртүүлөрдү киргизүүгө чакырган. Ал пост жарыялап, "айрым жоопкерчиликсиз адамдар" Олимпиадага катышып жаткан кыргыз спортчулары тамак-аштан өксүк болуп жатканы тууралуу жалган маалымат таратканын билдирген. Спортчулар туурасында чыккан видео эски экени аныкталган болчу.
Байсалов Парижден кайтып келгенден кийин аталган багытта мыйзамга өзгөртүүлөрдү талкуулоону демилгелей турганын билдирген.