БИШКЕК, 26-авг. — Sputnik. "Дени сак Евразия" аталышындагы дарыгерлердин эл аралык форумуна Армения, Беларусь, Казакстан, Кыргызстан, Молдова, Россия, Тажикстан, Түркмөнстан жана Өзбекстан мамлекеттеринен 150дөн ашык адистер катышты. Бул тууралуу "Евразия" эл аралык кызматташтыкты өнүктүрүү боюнча автономдуу коммерциялык эмес уюм билдирди.
Иш-чара 22-августтан 25-августка чейин Москва шаарында өттү.
"Дарыгерлер гранттык сынакка катышып, Евразиянын калкын медициналык багытта агарта турчу эл аралык блогдорду түзүшкөн. Мыкты долбоорлор каржылык жана эксперттик колдоо алды. Блогду ар кайсы өлкөлөрдөн келген медициналык кызматкерлердин командалары жүргүзүшөт", — дешти уюмдан.
Искусствонун меценаты, "Евразия" коммерциялык эмес уюмунун камкорчулар кеңешинин мүчөсү, "Победа" саясий блогунун лидери Илан Шор форумдарды Россияда гана эмес, башка өлкөлөрдө да өткөрүү пландалып жатканын белгиледи.
"Көп жылдар бою Батыш ар кайсы өлкөлөрдөгү адамдардын ортосундагы байланыштарды бузуп, аларга өз баалуулуктарын таңуулоого аракет жасап келди. Азыр жоготкон нерселерибизди калыбына келтирүүгө аракет кылып жатабыз. Тагыраагы, жалпы, салттуу баалуулуктарды карманган, окшош ой жүгүрткөн, бир тилде – орус тилинде сүйлөгөн адамдарды бириктирүү аракетиндебиз. Биз уюштурган форумдар иштеп жатканын көрүп турам. Мындан ары да ушул багытта иш жүргүзөбүз. Келечекте студенттер, бизнес жана башка коомчулуктар үчүн ушундай долбоорлорду ишке киргизип, диалогду жайылтабыз. Ошондой эле иш-чаралардын географиясын кеңейтип, Россияда гана эмес, башка өлкөлөрдө да форумдарды өткөрүү планыбызда бар", — деди Шор.
Жалпысынан 13 долбоор сунушталды. Жеңүүчүлөрдүн арасында "Евразия – ден соолуктун аймагы" агартуу платформасы, вейптин зыяндуулугу жөнүндө бир катар иш-чаралар, физикалык жана психикалык ден соолукту сактоо үчүн материалдар камтылган медиаплатформа, стоматологдор менен жеринде акысыз консультациялар бар. Адистер өздөрүнүн долбоорлорун иштеп чыгуу үчүн жабдууларды жана сертификаттарды алышты.
Мамлекеттик Думанын депутаты, "Евразия" коммерциялык эмес уюмунун кеңешинин төрайымы Алена Аршинова форумда баарлашуу жана тажрыйба алмашуу үчүн чек арасыз мейкиндик түзүү милдети коюлганын билдирди.
"Бул тапшырма аткарылганына кубанычтамын. Мен бул жерден тогуз өлкөнүн дарыгерлерин гана эмес, бир команданы көрүп турам. Алар бирдиктүү "Ден соолук мыйзамдарынын Евразиялык кодексин" түзө алды. Ошондой эле жеке жана блогдору аркылуу элге медицина боюнча билим бере алышат. Мындай натыйжа абдан баалуу", — деди Аршинова.
"Дени сак Евразия" форуму бизнес, билим берүү жана экскурсиялык программаларды камтыды. Белгилүү дарыгерлер, маркетологдор, юристтер, психологдор жана журналисттер медициналык кызматкерлердин кадыр-баркын кантип сактап калса болорун айтып беришти. Ал эми Стратегиялык сессияда дарыгерлер Евразиянын резиденттери үчүн "Ден соолук мыйзамдарынын евразиялык кодексинин" негизи болгон сунуштардын тизмесин түзүштү.