Кыргызстандык дарыгерлер катышкан "Дени сак Евразия" форуму жыйынтыкталды"Бейиш эненин таманында" тасмасы Москвада өткөн кинофестивалда баш байге алдыКыргызстанда көмүрдүн баасына убактылуу мамлекеттик жөнгө салуу киргизилет алдыда кененирээк2024-жылдын 15-сентябрынан тарта Кыргызстанда 90 календардык күнгө көмүрдүн баасына мамлекеттик жөнгө салуу киргизилет. Бул тууралуу министрлер кабинетинин маалымат кызматы билдирди. Мындай чара көмүрдүн кымбатташына жол бербөө жана анын калкка жекиликтүүлүгүн камсыздоо максатында көрүлөт. Кыргызстандын Экономика министрлигине караштуу Монополияга каршы жөнгө салуу кызматы социалдык маанилүү товарларга болгон бааларды жөнгө салуу тартибине ылайык, тийиштүү чараларды көрөт.
Футболчу Мирбек Ахматалиев 22-сентябрга чейин камакка алынганын Биринчи май райондук соту кабарлады. Ал Кылмыш-жаза кодексинин 131-беренеси "Ден соолукка анча оор эмес зыян келтирүү" боюнча айыпталып жатат. Футболчу №1 тергөө абагында. Буга чейин "Мурас Юнайтед" клубу Бишкекке машыгууга келгенде чыр-чатак болуп, анда Украинадан легионер болуп келген Евгений Терзи жаракат алып, жаагы сынганы айтылган. Окуядан кийин Кыргыз футбол союзу чырды баштады деген оюнчу Мирбек Ахматалиевди футбол ишмердүүлүгүнөн 5 жылга четтеткен.
Режиссер Руслан Акундун "Бейиш эненин таманында" тасмасы Москва шаарында өткөн XIII эл аралык "Будем жить" кинофестивалынын баш байгесин багындырды. Бул тууралуу Тышкы иштер министрлиги билдирди.Фестивалдын жабылышы 25-августта Москвадагы Борбордук кино үйүндө болуп, ага Кыргызстандын Россиядагы элчилигинин өкүлдөрү катышкан. "Сынактын баш байгесине кыргызстандык режиссёр Руслан Акундун эненин уулуна болгон сүйүүсүнүн күчүн баяндаган "Бейиш эненин таманында" тасмасы ээ болду. Ошондой эле бул фильм "Мыкты оператордук иш" номинациясында да сыйлык алды (оператор Каныбек Калматов)", — деп айтылат маалыматта. Быйыл эл аралык фестивалга катышууга 15 өлкөдөн 400дөн ашык эмгек жөнөтүлгөн. Сынактын программасына толук метраждуу жана кыска метраждуу көркөм фильмдер, ошондой эле даректүү тасмалар кирди.
"Дени сак Евразия" аталышындагы дарыгерлердин эл аралык форумуна Армения, Беларусь, Казакстан, Кыргызстан, Молдова, Россия, Тажикстан, Түркмөнстан жана Өзбекстан мамлекеттеринен 150дөн ашык адистер катышты. Бул тууралуу "Евразия" эл аралык кызматташтыкты өнүктүрүү боюнча автономдуу коммерциялык эмес уюм билдирди. Иш-чара 22-августтан 25-августка чейин Москва шаарында өттү. "Дарыгерлер гранттык сынакка катышып, Евразиянын калкын медициналык багытта агарта турчу эл аралык блогдорду түзүшкөн. Мыкты долбоорлор каржылык жана эксперттик колдоо алды. Блогду ар кайсы өлкөлөрдөн келген медициналык кызматкерлердин командалары жүргүзүшөт", — дешти уюмдан. Искусствонун меценаты, "Евразия" коммерциялык эмес уюмунун камкорчулар кеңешинин мүчөсү, "Победа" саясий блогунун лидери Илан Шор форумдарды Россияда гана эмес, башка өлкөлөрдө да өткөрүү пландалып жатканын белгиледи.ЭМИ ВАЛЮТА КУРСУ МЕНЕН ТААНЫШЫП АЛЫҢЫЗДАР Улуттук банктын билдирүүсү боюнча ушул тапта: 1 АКШ доллары 85 сом 34 тыйынга 1 евро 94 сом 92 тыйынга 1 рубль 93 тыйынга Казак тенгеси 17 тыйынга барабар МУНАЙ БААСЫ Бишкекте орточо эсеп менен алганда Аи 92 үлгүсүндөгү бензин 66 сом 90 тыйындан баштап, 68 сом 40 тыйынга чейин, Аи 95 үлгүсүндөгү күйүүчү май 73 сом 90 тыйындан тарта, 75 сом 40 тыйынга чейин, дизель майы 74 сом 80 тыйындан, 75 сом 30 тыйынга дейре, ал эми унаа газынын литри 36 сом 20 тыйындан сатылууда. АБА ЫРАЙЫ27-августка караган түнү жаан-чачын күтүлбөйт. Батыштан соккон шамалдын ылдамдыгы секундасына 4-9 метрге жетет. 27-август, шейшемби күндүз тоо этектеринде жана тоолуу райондордо өткүн өтүп, күн күркүрөшү күтүлөт, өрөөндөрдө күн ачык болот. Мындай маалыматты Кыргызгидромет таратты. Абанын температурасы Чүй аймагында +27...+32, Таласта +22...+27, Ош, Жалал-Абад жана Баткен жергесинде +30...+35, Ысык-Көл жана Нарын облустарында +25...+30 градус жылуу болот. Борбор калаа Бишкекте күндүн табы +29...+31, Ош шаарында +31...+33, Чолпон-Атада +25...+27 градуска жетет.