"Улуу Жибек Жолун жандандыруу тууралуу айтсак, учурдагы геосаясий абал баарыңыздарга белгилүү. Россия жана Беларусь аркылуу Европага кетип жаткан товарлардын жолу жабылды. Андан сырткары, Кытайдан Европага деңиз жолу аркылуу жүк ташылып турган. Бирок жыл башынан бери Кызыл деңизде каракчы топ пайда болуп, соода кербенинин жолуна бөгөт койду. Мындан улам ири фирмалар коопсуз жолго өтүшүп, Африка материгин айланып, жүктүн жетүү мөөнөтү узарып кетти. Мурда 25-30 күндө жеткен жүк, 70 күндө жетип, баалары эки жарым эсеге чейин кымбаттады. Бул соодагерлерге ыңгайсыздык жаратты. Мындай жагдайда биз эмне кылышыбыз керек? Коңшубуз Кытай — ири экономикалык өлкө. Өндүрүлгөн товарлардын көпчүлүгү Кытайда даярдалат. Ошондой эле дээрлик бүт дүйнө Кытай менен соода-сатык алакада. Биз ушул мүмкүнчүлүктү пайдаланып, Кыргызстан өзүн транзиттик өлкө катары таанытышы керек. Коңшу Казакстандын бул багытта жасап жаткан иштерин, мүмкүнчүлүктөрүн алсак, бизде алда канча көбүрөөк шарт бар. Мына ушул мүмкүнчүлүктөрдү колдонуу керек. Учурда ушул багытта иш жүргүзүп, Кытайдын бир нече шаарында өндүрүлгөн товарларды Жакынкы Чыгыш өлкөлөрүнө, Европага ташуу иштерин баштадык", — деди Маткерим уулу.