"Садыр акенин мисалында айткым келет. Ал өз балдарынан сырткары айылынын зирек жаштарын чогултуп, билим алууга алыс жактарга жиберген. Биздин айылдан чыккан алгачкы кыргыз саламаттык сактоо министри агабыз да ушундай инсан болгон. Ал окууга жиберип, билим алдырган жаштар да артындагыларды сүйрөгөн. Учурда айыл калкынын саны менен алып караганда жогорку билимдүүсү эң көп кыштак биздики. Мындай көрүнүштөр кыргызда кечээ эле бар болчу. Өзү билимге жетип же кандайдыр бир ийгилик багындарган инсандар кичи мекениндеги коомду агартууну, андагы жаш муунду билимге сугарууну өзүнүн милдети катары саначу. Бул абдан туура түшүнүк. Табияттын мыйзамы да ушундай эмеспи. Биз ушул аң-сезимге кайтып келишибиз керек. Ал үчүн эстетикалык билим берүүнү күчөтүп, адамдардын жан дүйнөсүн ача билишибиз зарыл", — деди Жакыпов.