БИШКЕК, 23-авг. — Sputnik. Ош шаарында 7-10 жылдык мөөнөткө бөлүп төлөө менен өз баасында үй алууга мүмкүнчүлүк түзүлдү. Бул тууралуу мэриянын маалымат кызматы кабарлады.
Ош мэриясынын муниципалдык ипотекалык ишканасы ипотекалык жана үлүштүк курулуш шартында элди турак жай менен камсыз кылуу багытында 2024-2027-жылдарга "Жеткиликтүү турак жай" программасын ишке ашыруу концепциясын иштеп чыкканы белгиленди. Үлүштүк программа жарандарга жөнөкөйлөштүрүлгөн шартта өз баасында үй алууга мүмкүнчүлүк түзөт.
Анын алкагында муниципалдык ипотекалык ишкана менен "Айыл банктын" ортосунда эки тараптуу макулдашууга кол коюлган.
"Ага ылайык, өлкө жарандары жашаган жерине, каттоосуна, иштеген иши, ишмердүүлүгүнүн багытына карабастан 7-10 жылдык мөөнөттө бөлүп төлөө шарты менен өз баасында турак жайлуу боло алат", — деп жазылган маалыматта.
Кызыкдар тараптар муниципалдык ипотека ишканасына кайрылса болот: (03222) 7-01-27