Мамлекет башчысы Садыр Жапаров буга чейин Жогорку кенештин депутаттары кабыл алган «Кыргызстандын жарандарынын ден соолугун тамекини, никотинди керектөөнүн кесепеттеринен жана экологияны тамеки түтүнүнүн жана аэрозолдун таасиринен коргоо жөнүндө» Кыргыз Республикасынын мыйзамына өзгөртүүлөр жана толуктоолорду киргизүү мыйзамын артка кайтарды. Парламенттин сайтында жазылгандай, документ мамлекет башчынын каршы пикири менен кайтарылган. Садыр Жапаров мыйзам долбоорун кабыл алууда Министрлер кабинетинин жеке сын-пикирлери эске алынбаганын белгилеген. Президент кылмыштын сыпатталышында жаза сунушталып жаткан зыяндын чеги көрсөтүлбөгөнүн, бул бардык күнөөлүүлөрдү импорттолгон товарлардын көлөмүнө карабастан кылмыш жоопкерчилигине тартууну шарттаарын билдирген. Мыйзам долбоору кайрадан иштеп чыгууга Жогорку Кеңешке кайтарылды.
Жаратылыш ресурстары, экология жана техникалык көзөмөл министрлигинин Геологиялык кызматынын жер казынасын иштетүү башкармалыгынын жетекчиси менен П.А.Т. ЖЧКсынын мурдагы жетекчиси кармалды. Бул тууралуу УКМК билдирди.Маалыматка караганда, экөө тең Талас РИИБинин убактылуу кармоочу жайына киргизилген. "Тараптар макулдашып алып алтын, күмүш, жез, коргошун, висмут жана цинкке геологиялык издөө иштерин жүргүзүү максатында мыйзамдардын талаптарын бузуу менен жер казынасын пайдалануу укугу боюнча лицензияны мыйзамсыз трансформациялашкан. Мындай коррупциялык схема таза иштеген компанияларга тоскоолдук кылып, инвестициялык климатка терс таасир тийгизген", — деп айтылат маалыматта. Көрүлгөн чаралардын натыйжасында алтындын 10 тоннадан ашык запасы бар жер казынасын пайдалануу укугуна берилген лицензия жокко чыгарылды.
Бишкекте Каба уулу Кожомкул атындагы спорт ордосунда кыргыз күрөшү боюнча президенттин кубогу жана II дүйнөлүк чемпионаты өтүүдө. Бул тууралуу Дене тарбия жана спорт департаментинен басма сөз кызматы билдирди. Маалыматка ылайык, мелдештин биринчи күнүндө улуттук курама команда төрт медаль утту. 60 килограммга чейинки салмак ченинде Бегай Бейшенаалы кызы 1-орунду алса, анын кесиптеши Бегайым Акбалаева коло байгеге ээ болду. 65 килограммга чейинки салмак ченинде Айдана Кубанычбекова подиумга экинчи орунга көтөрүлдү. 65 килограммдан жогорку салмакта Назира Арызбекова коло байгеге ээ болду. Бактияр Мирлан уулу ачык салмакта президенттин кубогуна ээ болсо, Бекболот Токтогонов 3-орунду ээледи. Мелдешке 35 өлкөдөн келген 200дөн ашык спортчу катышууда. Жалпы байге фонду 1 млн сомду түзөт.
Россиянын АКШдагы элчиси АнатОлий АнтОнов Киев Россиянын ичинде кандайдыр бир "буфер аймагын" түзө албастыгын, бул мүмкүн эместигин айтты. Маалыматты РИА Новости жазды. Буга чейин Владимир Зеленский Украина армиясынын Курскиге койгон чабуулунун себеби Россияда "буфер аймагын" түзүү максаты экендигин айткан. "Бул мүмкүн эмес, мүмкүн эмес. Россия Федерациясынын аймагында буфердик эч кандай аймак болбойт", — деген россиялык элчи журналисттерге. Киевдин мындай билдирүүлөрүн АКШ четке каккан жок деген тактоочу суроолорго да жооп берген.