БИШКЕК, 21-авг. — Sputnik. Улуттук банктын алтын куймаларынын алты түрүнөн төртөөнүн баасы рекорддук чекке жетти.
Кыргызстандын Улуттук банкы 2015-жылдан тарта эл инвестиция жасап же сакташы үчүн алтын куймаларын сата баштаган. Бардыгы болуп бир граммдан 100 граммга чейинки алты түр куюлган.
Эскерте кетсек, алтынды сатуу жана сатып алуу баасы күн сайын бекитилет, нарк баалуу металлдар рыногунун Лондон ассоциациясынын кечки фиксингинен көз каранды (дүйнөлүк баа).
Алтындын дүйнөлүк баасы
Акыркы күндөрү баалуу металлдын баасы жогорулай баштады, дүйшөмбү күнү биринчи ирет унциясына (31,1 грамм) 2,5 миң долларлык чектен ашкан, ал эми Лондон ассоциациясынын кечки финксинги 2 миң 530 долларга жетти.
Улуттук банктын 21-августка карата баасы:
100 граммдык куймалар — 725 928 сом (рекорд);
унция (31,1 грамм) — 225 750 сом (рекорд);
10 граммдык — 72 595,5 сом (рекорд);
5 граммдык — 36 790 сом (рекорд);
2 граммдык — 15 498 сом (экинчи орун, рекорддук баа 9,5 сомго жогору болчу);
1 граммдык — 8 398,5 сом (рекорд болбосо да жогорку баанын бири).
Салыштыруу үчүн айтсак, бир жумада алтын куймалардын баасы кыйла өстү, мисалы, бир граммдыгы 160 сомго, ал эми 100 граммдыгынын баасы 16,5 миң сомго жогорулады.
Кыстырма
Куймалардын баасы деле доллардын наркынан көз каранды. Учурда Улуттук банктын расмий курсу 85,67 сомдун чегинде турат, бул рекорддук көрсөткүч эмес, мисалы, үстүбүздөгү жылдын февралында чет элдик валюта 105 сомдон сатылган эле.