БИШКЕК, 20-авг. — Sputnik. Курск облусунун бардык аймагында Украинанын Куралдуу күчтөрүнүн бөлүктөрү токтотулуп, каршылаш тараптын негизги ресурстары жок кылынды. Бул тууралуу Россиянын Коргоо министрлигинин Башкы аскердик-саясий башкармалыгынын жетекчисинин орун басары Апти Алаудинов РИА Новостиге билдирди.
"Алгачкы күндөрү душмандын негизги күчтөрүн токтотуу менен алек болуп, ийгиликке жетиштик. Каршылаштардын аракети бүткүл периметр боюнча токтотулду", — деди Алаудинов "Россия 1" телеканалынын эфиринде.
Ал душмандын негизги ресурстары менен алдыдагы эшелондорун жок кылууга мүмкүн болгонун кошумчалады.
Украинанын Куралдуу күчтөрүнүн бөлүктөрү 6-августта эртең менен Курск облусунун аймагын басып алуу максатында чабуулга өтүп, алардын алдыга жылышы токтотулган. 19-августта Россиянын Коргоо министрлиги Курск багытындагы салгылашууда Украинанын Куралдуу күчтөрү 3,8 миңге жакын аскер кызматкерин жана 54 танкын жоготкондугун билдирген.
Курск, Белгород жана Брянск облустарында антитеррордук операция режими киргизилди.