БИШКЕК, 19-авг. — Sputnik. Кыргызстанда бүгүнкү күндө маймыл чечек оорусу катталбаган жана бул оору боюнча өлкөдө эпидемиологиялык абал туруктуу, алдын алуу чаралары көрүлүп жатат. Бул тууралуу Саламаттык сактоо министрлиги билдирди.
Эскерте кетсек, 15-августта Дүйнөлүк саламаттык сактоо уюму аталган илдеттин көбөйүшүнө байланыштуу өзгөчө кырдаал жарыялаган. Африканын айрым аймактарында адамдан жугуучу маймыл чечек оорусу кескин өсүүдө. Жыл башынан бери Конгодо ооругандардын саны өткөн жылдагыдан ашып 15 600 адамды түзгөндүгү айтылды. Андан тышкары, үстүбүздөгү жылдын 16-августунда Африкадан тышкары Швеция менен Пакистан өлкөлөрүндө дагы оорунун эки учуру катталгандыгы белгилүү болгон.
"Министрлик тарабынан маймыл чечек оорусунун келип чыгышын алдын алуучу иш-чаралар жүргүзүлүүдө, бүгүнкү күндө аэропорттордо, темир жол бекеттеринде жана чек ара постторунда маймыл чечек оорусу катталган өлкөлөрдөн келген жарандарга өзгөчө көңүл буруу менен санитардык-карантиндик пунктуларда алдын алуу иш-чаралары күчөтүлдү. Санитардык-карантиндик пунктулар дене табы көтөрүлгөн адамдарды өз убагында аныктоо үчүн тепловизор жана байланышсыз термометрлер менен жабдылган", — деп айтылат маалыматта.
Министрлик ДССУнун техникалык колдоосу менен 2022-жылы маймыл чечек вирусун аныктоо үчүн 3000 ПЧР тест-системаларын алганын билдирди. 2024-жылдын 19-августуна карата 500 ПЧР тест-системасы бар.
Ведомство маймыл чечек оорусуна каршы алдын алуу иштер улантылып жатканын, ооруну эрте аныктоо үчүн кошумча ПЧР тест-системалар алынарын белгилеген. Мындан тышкары, муфтият менен биргеликте иш жүргүзүп, калкка маймыл чечек оорусу боюнча өз убагында маалымат берилип турары айтылды.
Маймыл чечек оорусуна байланыштуу айрым өлкөлөрдөгү эпидемиологиялык абалды эске алуу менен министрлик оору катталган өлкөлөргө барууну пландап жаткан жарандарга сактык чараларын көрүүнү сунуштады.
Маймыл чечеги — сейрек кездешүүчү жугуштуу вирустук инфекция. Ал бир адамдан экинчи адамга жугат. Бул илдет илешкенде баш, бел ооруп, адам чыйрыгып, шалдырайт. Көбүнчө бетке кызыл бүдүрлөр чыгып кетет.