БИШКЕК, 19-авг. — Sputnik. Газа секторундагы гуманитардык зонанын аянты эксклавдын территориясынын 11 пайызын гана түзүп, кыскарып жатат. Бул тууралуу БУУнун палестиналык качкындарга жардам берүү жана иштерди уюштуруу боюнча Жакынкы Чыгыш агенттиги билдиргенин РИА Новости жазды.
"Гуманитардык зона азыр Газа секторунун болгону 11 пайызын түзөт, жагдай көчүрүлүп жаткандар арасында башаламандык жана коркууну жаратып жатат", — деп айтылат маалыматта.
БУУнун агенттиги, мындан тышкары, элди көчүрүү иштери да кыйындап жатканын айтып, тараптарды атышууну токтотууга чакырган.
Эскерте кетсек, былтыркы жылдын 7-октябрында Израиль Газа секторунан жасалган ракеталык чабуулга кабылган. Андан соң палестиналык ХАМАС кыймылынын жоокерлери чек аралаш райондорго кирип барып, ок атып, 200дөй кишини туткундап алган. Израиль бийлигинин айтымында, 1,2 миңдей адам каза тапты.
Мындан соң Израиль армиясы Газа секторунда операция баштап, анклавды блокадага алган. Эл суусуз, электр жарыгысыз, азык-түлүк жана дары-дармексиз калган. Газанын Саламаттык сактоо министрлигинин маалыматы боюнча, израилдик соккулардын натыйжасында 7-октябрдан бери 39 миңден ашуун киши каза таап, 90 миңден көп адам жаракат алган.
РФ ТИМи тараптарды согуштук аракеттерди токтотууга чакырып келет. Москва кырдаалды 1967-жылы бекитилген чек арасы менен Палестина мамлекетин түзүү каралган БУУ Коопсуздук кеңешинин формуласы менен жөнгө салууга болот деген позицияда.