БИШКЕК, 18-авг. — Sputnik. Жалпы билим берүү уюмдарында 1-11-класстардын окуучуларынын формасы классикалык стилде болушу шарт. Бул тууралуу Билим берүү жана илим министрлигинен кабарлашты.
Ведомство өкмөттүн 2015-жылдын 12-августунда бекитилген токтомуна таянган. Ага ылайык, эркек балдар классикалык стилде тигилген көйнөк, жилет, шым жана пиджак киет. Пиджак, жилет жана шым бир түстүү кездемеден (кара, боз, көк жана кочкул кызыл) болушу керек.
"Кыздар болсо классикалык стилде тигилген блузка, жилет, юбка, шым, көйнөк, фартук, пиджак киет. Пиджак, көйнөк жана шым бир түстө болушу шарт. Аз камсыз болгон ата-энелер балдарын "үстү ачык (ак), асты кара" форма менен камсыздаса болот", — деп жазылат маалыматта.
Министрлик жалпы билим берүү уюмдарында спорттук кийим, бут кийим, жынсы, пляжга, үйгө кийген кийимдерди кийүүгө уруксат берилбей турганын эскертти.