Башкы прокуратура үй-бүлөдөгү зомбулук боюнча соцролик жарыялап, жарандарды кайдыгер болбоого чакырды. Видеодо кошуна үй-бүлөдө болгон чыр-чатакты укмаксан болуп көз жуумп койгон коңшулар көрсөтүлөт. Чатактын аягы трагедия менен бүткөн. Башкы прокуратура үй-бүлөдөгү зомбулук учурлары тууралуу дароо укук коргоо органдарына кабарлоону өтүндү. 2024-жылдын төрт айында эле Кыргызстанда 4 767 үй-бүлөлүк зомбулук фактысы катталган. Бул өткөн жылдын ушул мезгилине салыштырмалуу 632 учурга көп.
Кыргыз-өзбек автозаводунда чогултулган унаалар "Жеңилдетилген автокредит" долбоору аркылуу насыяга берилет. Бул тууралуу "Айыл банктын” талдап иликтөө жана коштоо бөлүмүнүн башчысы Нарынбек Токтогулов Sputnik Кыргызстан радиосунун эфиринде маек куруп жатып билдирди. Анын айтымында, насыялар мамлекеттик эки банк, "Айыл банк” жана "Элдик банк"тарабынан сегиз пайыз жылдык үстөгү менен берилет. Мамлекеттик органдар, юридикалык жактар жана жеке ишкерлер 5 жылга 100 миллион сомго чейин, ал эми жеке жактар 3 миллион сомго чейин каражат ала алышат. Ал ошондой эле Кыргызстандын автозаводунан чыгарылган унааларды ала тургандар, 20 пайыз минималдуу баштапкы төлөмдү жабышы керектигин кошумчалады.
Улуттук банк күн сайын расмий курсу жарыяланган валюталардын катарына Кытай юанын кошту. Чечим 1-сентябрдан тарта күчүнө кирет. Учурда юандын сомго карата курсу аптасына бир жолу жарыяланат. Улуттук банк күн сайын евро, доллар, рубль жана теңгенин курсун жарыялайт. Расмий курсту чечмелөөнүн жөнөкөй жана татаал жолу бар. Муну доллардын мисалында айта турган болсок, мындай болот: Жөнөкөй жол — мурдагы күн үчүн орточо курс; Татаал жолу — расмий курс, мисалы, шаршемби үчүн курс шейшемби кечинде жарыяланат, ал дүйшөмбү саат 15:00дөн шейшемби 15:00гө чейин доллар менен болгон операциялардын негизинде аныкталат. Улуттук банк, коммерциялык банктар жана акча алмаштыруучу жайлар валютаны расмий курс боюнча сатып алууга - сатууга милдеттүү эмес. Доллардын жана башка валютанын расмий курсу бажы төлөмдөрүн, салыктарды жана башкаларды эсептөөдө колдонулат.
Украина Россиянын Курск облусундагы чагымчылыгы үчүн жазаланып, бир нече шаарларынан кол жууйт. Бул тууралуу АКШ Куралдуу күчтөрүнүн экс-чалгынчысы Скотт Риттер айтканын Sputnik радиосу жазды. "Кырдаал Курск облусунун тазаланышы менен бүтпөйт. Украина жазаланат. Бул алар кирип келген Сумская облусунан кол жууйт деген сөз. Харьков, Днепропетровск, Николаев, Одесса шаарларынан ажырайт", — деген Риттер Judging Freedom YouTube-каналынын эфиринде. Анын айтымында, Киев жетекчилиги Курскиге кирип Украинанын келечегин туңгуюкка кептей турган чечим кабыл алган. Риттер киев режимин РФ президенти Владимир Путиндин жай тургундарга жана жарандык инфраструктурага ылгабай ок чыгарган тарап менен тынчтык сүйлөшүүлөрүн жүргүзүүгө болбойт деген сөзүнө кулак салууга чакырды. "Орустар жаалына келип турат. Демек, эгер Путин сүйлөшүү болбойт десе, бул согуш Россиянын койгон шартынын негизинде гана жыйынтыкталат деген сөз", — деди Риттер.