Учурда жаштар кылмыштуу топко же саясатка эмес, жаратмандыкка кызыга баштады. Муну менен катар жаштардын шайлоого катышуу активдүүлүгүн көтөрүү керек. Бул тууралуу Жакшылык Бекназаров Sputnik Кыргызстан радиосуна маек куруп жатып билдирди.
Анын айтымында, кыргыз жаштары да экологиялык жана социалдык көйгөйлөр менен өз алдынча күрөшүп, ошондой эле тил, маданият багытын көтөрүүдө.
"Жаштар — бул келечек эмес, алар бүгүнкү учур. Бизге дайыма эле "силердин келечегиңер эртең" дешет. Жаштар коомдун ажырагыс бир бөлүгү экенин түшүнүшүбүз керек. Бүгүнкү күндүн эң чоң жетишкендиги — жаштар муну түшүндү. Мурдагыдай "сен эртеңки келечексиң, коё тур" дегенге ишенбей калды. Жакында эле КМШ мамлекеттери катышкан ыктыярчылык боюнча жаштар форуму өттү. Азербайжан, Өзбекстан, Казакстандын жаштары менен биргеликте жасаган иштерибизди айтып, тажырыйбаларыбыз менен бөлүштүк. Ошондо башкалар "силер өз ишиңерди эч кимден көз карандысыз эле өзүңөр жасай берет экенсиңер" деп бизге абдан таң калышты. Алар бардык кадамдары үчүн жогору жактан уруксат кагаз алып турушат экен. 1990-жылдардан 2000-жылдарга чейин жаштар арасында өз районун кармаган, авторитет үчүн күрөшкөн бандиттер барктуу болуп, баары ошондой болгусу келчү. Ал эми 2010-жылдан 2019-жылга чейин кыргыз жаштары үчүн саясатчылар үлгү болуптур. Азыр жаштарда кадимкидей өзгөрүү пайда болуп, жаратмандыкка басым жасалууда. Ишкерликке кызыгуу күч. Мурдагы жылы Ошто президенттин катышуусунда "Кыялымдагы Кыргызстан" форумун өткөрүп, жаштар уюму түзүлүшү керектигин айтканбыз. Өлкөдө калктын 35 пайызын жаштар түзөт. Алардын үнүн угуп, активдүү иштешкен 50гө жакын уюм бар. Ошондой эле жаштар шайлоодо жарандык активдүүлүгүн көрсөтө албай калып жатат", — деди Бекназаров.
Ал жер-жерлерде жаштардын шайлоого катышуу деңгээлин көтөрүүнү максат кылып жатышканын кошумчалады.