Өлкөнүн ички дүң продукциясы быйылкы алты айда өткөн жылдын ушул мезгилине салыштырмалуу 8,7 пайызга жогорулады. Бул тууралуу Улуттук статистика комитети маалымдады. Жарым жылда ички дүң продукциянын көлөмү 677 млрд. сомду түзгөн. "ички дүң продукциянын өсүшү товардык өндүрүш, кызмат көрсөтүүчү тармактардын жана салыктардын темпинин жогорулашынан улам камсыздалды. Товардык өндүрүш тармактарынын өсүү темпи өткөн жылдын январь-июлуна салыштырмалуу 9 пайызга, кызмат көрсөтүүчү тармактардын өсүү темпи 8,4 пайызга жогорулады", – деп айтылат комитеттин маалыматында. Ички дүң продукциянын түзүмүндө эң чоң үлүш тактап айтканда, 50,7 пайызы кызмат көрсөтүүчү тармактарга туура келген. Ал эми товар өндүрүүчү тармактардын үлүшү 30,4 пайызды түзгөн.
Борбор Азиянын интеграциясын өркүндөтүү үчүн коопсуздук маселелерин чечүү керек. Мындай пикирин мурдагы вице-премьер Токон Мамытов Sputnik Кыргызстан агенттигиндеги иш-чарада сүйлөп жатып билдирди. "Борбор Азия туш келген коркунучтарды, чакырыктарды жана тобокелдиктерди аныктоого убакыт келгенин белгилейм. Андан кийин көйгөйлөрдү алдын алуу жолдору аныкталышы мүмкүн. Бул оңой-олтоң иш эмес, бирок интеграциялоо процессин өнүктүрөбүз десек, каалайбызбы-каалабайбызбы, коопсуздукту камсыздоо маселесин биринчи кезекте чечүү зарыл", — деди Мамытов. Эске салсак, 9-августта Астанада Борбор Азия мамлекеттеринин башчыларынын саммити өттү. Анда аймактык алаканы өнүктүрүү стратегиясы, ошондой эле достук, коңшулук жана кызматташтык жөнүндө келишимге кол коюлду.
Жумушсуз деп катталган жарандардын саны өлкө боюнча жарым жылда 17 миң адамга азайды. Бул тууралуу Эмгек, социалдык камсыздоо жана миграция министрлиги маалымдады. Жыл башынан бери ишке орноштуруу боюнча кызматтар тарабынан 6300дөн ашуун адам жумушка орношкон. Ал эми акы төлөнүүчү коомдук жумуштарга 5800ү жөнөтүлгон.Учурда республика боюнча 81 453 жумушсуз киши министрликте каттоодо турат.
Сербияда литий казууга каршы өтүп жаткан каршылык акциялары экологияны коргоо эмес, азыркы бийликти кулатуу максатын көздөйт. Бул тууралуу өлкөнүн вице-премьери Александр Вулин РИА Новости агенттигине маек куруп жатып билдирген. "Литийден улам өтүп жаткан акциялардын экологияга дегеле байланышы жок. Максаты — бийликти кулатуу. Батыш Сербиянын өнүгүүсүн, өз алдынча, күчтүү мамлекет болуусун каалабайт", — деген өкмөт башчынын орун басары. Сербиянын батышында курамында литий бар ядорит минералын казууга каршы массалык акциялар уланууда. Митингчилер 11-августка караган түнү эл аралык Будапешт — Салоники трассасындагы көпүрөнү, борбордук темир жол бекети менен Новый Белград станциясына кеткен жолду тосуп алышкан. ИИМдин маалыматы боюнча, акцияга 27 миңдин тегерегиндеги киши катышкан, жалпы жонунан 17 жергиликтүү, эки чет элдик жаран кармалды.