БИШКЕК, 12-авг. — Sputnik. Борбор Азиянын интеграциясын өркүндөтүү үчүн коопсуздук маселелерин чечүү керек. Бул тууралуу мурдагы вице-премьер, саясий илимдердин доктору Токон Мамытов билдирди.
Ал Борбор Азиянын мамлекет башчыларынын Астанада өткөн саммитинин жыйынтыгы боюнча Sputnik Кыргызстан агенттиги уюштурган иш-чарада сүйлөдү.
"Борбор Азия туш келген коркунучтарды, чакырыктарды жана тобокелдиктерди аныктоого убакыт келгенин белгилейм. Андан кийин көйгөйлөрдү алдын алуу жолдору аныкталышы мүмкүн. Бул оңой-олтоң иш эмес, бирок интеграциялоо процессин өнүктүрөбүз десек, каалайбызбы-каалабайбызбы, коопсуздукту камсыздоо маселесин биринчи кезекте чечүү зарыл", — деди Мамытов.
Эске салсак, 9-августта Астанада Борбор Азия мамлекеттеринин башчыларынын саммити өттү. Анда аймактык алаканы өнүктүрүү стратегиясы, ошондой эле достук, коңшулук жана кызматташтык жөнүндө келишимге кол коюлду.