БИШКЕК, 12-авг. — Sputnik. Сербияда литий казууга каршы өтүп жаткан каршылык акциялары экологияны коргоо эмес, азыркы бийликти кулатуу максатын көздөйт. Бул тууралуу өлкөнүн вице-премьери Александр Вулин РИА Новости агенттигине маек куруп жатып билдирген.
"Литийден улам өтүп жаткан акциялардын экологияга дегеле байланышы жок. Максаты — бийликти кулатуу. Батыш Сербиянын өнүгүүсүн, өз алдынчалуу, күчтүү мамлекет болуусун каалабайт", — деген өкмөт башчынын орун басары.
Сербиянын батышында курамында литий бар ядорит минералын казууга каршы массалык акциялар уланууда. Митингчилер 11-августка караган түнү эл аралык Будапешт — Салоники трассасындагы көпүрөнү, борбордук темир жол бекети менен Новый Белград станциясына кеткен жолду тосуп алышкан. ИИМдин маалыматы боюнча, акцияга 27 миңдин тегерегиндеги киши катышкан, жалпы жонунан 17 жергиликтүү, эки чет элдик жаран кармалды.
Июлда Сербия бийлиги Евробиримдик менен сырьелук ресурс, электр батареялары жана электр автоунаалары жаатында стратегиялык өнөктөштүк боюнча меморандумга кол койгон. Президент Александр Вучичтин айтымында, бул республикага алты миллиард евролук түз чет элдик инвестиция алып келмек. Эгер өндүрүш толугу менен ишке кирсе Сербиянын ИДПсы 16,4 пайызга жогорулайт, биринчи этапта 2023-жылга салыштырмалуу төрт пайызга көтөрүлөт (Дүйнөлүк банктын маалыматы боюнча, бул 75 миллиард долллар).
Өлкө бийлиги долбоордун тобокелдик жагдайларына эксперттер да баа бериши керектигин, мындан улам референдум жүрүшү мүмкүн экенин белгилеген. Эгер колдоо тапса казуу иштери 2,5 жылдан кийин башталат. Бирок Сербияда экологиялык кыймылдардын өкүлдөрү каршылык акцияларын уюштуруп, аларды батышчыл оппозиция менен ЖМКлар колдоп чыгышкан.
Вучич 11-августта элге кайрылып, литий казууга каршы акцияга чыккандарды Батыштагы айрым күчтөр жана теги серб медиамагнат Драган Шолак жиреп-сүрөп жатканын белгиледи. Анын айтымында, Шолак Нидерланддагы медиахолдингге, Батыш Балкандагы кабелдик операторлор менен ЖМКларга ээлик кылат.