2024-жылдын жарым жылдыгында чакан ишканаларды эсепке албаганда бир кызматкердин орточо айлык акысы 35 миң 298 сомду түздү. Бул тууралуу Экономика жана коммерция министрлиги билдирди. Маалыматка ылайык, бул көрсөткүч 2023-жылдын тийиштүү ушул мезгилине салыштырмалуу 10,6 пайызга, ал эми реалдуу эмгек акынын өлчөмү керектөө бааларынын индексин эске алуу менен – 5,2 пайызга өскөн. “2024-жылдын алгачкы алты айында өткөн жылдын тиешелүү мезгилине салыштырмалуу номиналдык эсептелген орточо айлык эмгек акынын өсүү темпинин жогорулашы экономикалык ишмердиктин бардык түрдөгү ишканаларында жана уюмдарында байкалды, — деп айтылат билдирүүдө.
Бүгүн, 12-августта, Кыргызстанда келе жаткан 2024-2025-окуу жылына карата жогорку окуу жайларга тандоонун жана кабыл алуунун акыркы 5- туру башталды. Бул тууралуу Билим берүү жана илим министрлигинин басма сөз кызматы кабарлады. Маалыматка ылайык, каттоо автоматташтырылган маалыматтык системасы аркылуу 14-август саат 14:00гө чейин жүргүзүлөт. Белгилей кетсек, жогорку окуу жайларга I, II, III, IV турда жалпы 24 миң 797 абитуриент кабыл алынган.
Автоээнбаштык жасаган той кортежинин унаалары айып короого токтотулду. Бул тууралуу жол кыймылынын коопсуздугун камсыздоо башкы башкармалыгынан билдиришти. Маалыматка ылайык, социалдык тармактарда той кортежинин унаалары жолду тороп, оюн салып бараткан видео тараган. Анда унаадан бир адам белине чейин чыгып алганын дагы көрүүгө болот. "Бишкек — Чалдыбар унаа жолунда жолду тороп башкаларга тоскоолдук жараткан 4 автоунаанын айдоочусун Чүй облусунун жол тескөөчүлөрү кармап, ар бирине 15 миң сомдон айып салды", — деп айтылат маалыматта. Ошондой эле ээнбаш айдоочулардын унаалары айып короого киргизилгени кошумчаланды.
Владимир Зеленский Курск облусуна коюлчу чабуулду даярдоодо Украинанын Куралдуу күчтөрүнүн генералдарына басым жасаган. Бул туурасында Коргонуу боюнча иликтөөлөрдүн падышалык бириккен институтунун илимий кызматкери Майкл Кларк басылмалардын бирине айткандыгын РИА Новости жазды. "Бизде анын изин бардык жерден көрүүгө болот. Жайкы чабуулду башташ үчүн президент командачыларга басым кылганы Киевге көп айдан бери жашыруун деле болбой калды. Алар Украинада адамдар жана ресурстар боюнча жаралган маселеден улам олку-солку болушкан", — деп айтылат анда. Эксперт чектешкен аймактарга чабуул коюу Зеленскийдин бул согуш учурундагы тобокелге салган кадамдарынын бири болуп калгандыгын белгилеген. Анын пикиринде, Киев Донбасста көбүрөөк керек боло турган бириктирилген күчтөрүн колдонуунун такыр эле пайдасыз ыкмасын ойлоп таап алышкан. "Бул контрчабуул согуштун жүрүшүн өзгөртө албайт", — деген аналитик. Эске салсак, 2024-жылдын 6-августунда таңга маал украин аскерлери Курск облусунун Суджан аймагындагы тилкени алууга аракет кылышкан.