Бишкек — Ош жолунун 100 чакырымы оңдоп-түзөөдөн өтөт. Бул тууралуу Транспорт министрлигинен билдиришти. Маалым болгондой, аталган жолдун жалпы узундугу 678 чакырымды түзөт. Ал 1964-1965-жылдары курулуп, колдонууга берилген. 2002-жылы реабилитациядан өткөрүлгөн. Министрлик белгилегендей, Бишкек — Ош жолунан тынымсыз унаалар жүрүп тургандыктан аны капиталдык оңдоодон өткөрүү керек болуп турат. Жолдо пайда болгон чуңкурларды жамоо да убактылуу гана чара болуп саналат. Андыктан бул жолдун 100 чакырымын оңдоп, жаңы асфальт басуу пландалууда. Алгач Суусамыр өрөөнүндөгү 10 чакырым жол жаңыланат. Учурда долбоордук-сметалык иш кагаздар даярдалып, курулуш иштерин уюштуруу боюнча жумуштар жүрүүдө. Бүгүнкү күнгө чейин аталган жолдун Суусамырдагы бөлүгүндө 13 миң чарчы метр чуңкур жамалган. 2022-жылы Төө-Ашуу ашуунун түштүк тарабындагы 9,5 чакырым жолго 2 катмарлуу асфальт төшөлгөн.
КМШнын Аткаруу комитети менен Евразия экономикалык комиссиясы 2030-жылга чейин транспорт коридорлорун өнүктүрүүгө багытталган биргелешкен иш-чаралардын планын даярдоону пландаштырууда. Бул тууралуу ЕЭКтин маалымат кызматы кабарлады. Маселе ЕЭКтин энергетика жана инфраструктура министри Арзыбек Кожошев менен Координациялык транспорттук кеңешменин аткаруу комитетинин төрагасы Геннадий БессОновдун жолугушуусунда талкууланган. "Жыйындын катышуучулары ЕАЭБ жана КМШ алкагында транспорттук инфраструктураны өнүктүрүү боюнча аткарылган иштерди белгилешти. Алар ЕАЭБ жана КМШ өлкөлөрүнүн аймактары аркылуу өтө турган транспорттук коридорлорду өнүктүрүүнү координациялоо боюнча кызматташууну кеңейтүү ниетин билдиришкен", — деп жазылат маалыматта. Жолугушуунун жыйынтыгында 2030-жылга чейин транспорт коридорлорун өнүктүрүүгө багытталган биргелешкен иш-чаралардын планын даярдоо боюнча протоколго кол коюу чечими кабыл алынды.**Бүгүн Париждеги 33-жайкы Олимпиада оюндарында кыргызстандык спортчу Айпери Медет кызы күч сынашат. Ал коло медаль алуу үчүн күрөшмөкчү, азырынча анын атаандашы белгисиз. Беттештер саат 15:00дө башталат. Ал эми Эрназар Акматалиев коло медаль үчүн күрөшүү мүмкүнчүлүгүнөн ажырады. Себеби аны жеңип алган венгриялык Исмаил Мусукаев жарым финалда утулуп калды. Ошону менен бүгүн Париждеги Олимпиада аяктайт.
Өткөн түнү атып түшүрүлгөн Украинанын ракетасы Курск аймагындагы эл жашаган көп кабаттуу үйгө кулап, өрт чыккан. Бул тууралуу аталган облустун губернаторунун милдетин аткаруучу Алексей СмирнОв билдиргенин Sputnik радиосу жазды. СмирнОвдун айтымында, Учурда ракетанын бөлүктөрү түшкөн аймакта бардык ыкчам кызматтар иштеп жатат. Тилекке каршы, ушул тапта украиналык террорчулардын чабуулунан 13 адамдын жабыркаганы белгилүү болду. Алардын ичинен экөөнүн абалы оор. Кырсык катталган аймакта бир нече Тез жардам кызматы иш алып барууда. Өз кезинде Курск шаарынын мэри Игорь Куцак үйдүн жашоочулары шаар четиндеги лагерге убактылуу көчүрүлөрүн билдирген. Россиянын ӨКМинин аймактык башкармалыгы саат 01:15те өрт толугу менен өчүрүлгөнүн маалымдаган.