Улуттук банктын алтын-валюта резервинин көлөмү июлдун аягына карата 3 миллиард 987 миллион 950 доллар деп бааланды. Бир айда 203 миллион 550 миң долларга өскөн.Азыркы көрсөткүчтү тарыхтагы рекорддук деп эсептесе болот. Буга чейинки эң көп 3 миллиард 784,4 миллион долларга чыгып, ушул жылдын май айынын соңунда катталган.Белгилей кетсек, өткөн айда Улуттук банк эки жолу интервенция жасап, эки жолу тең чет элдик валютаны жалпысынан 82,4 миллион долларга сатып алган.
Минск шаарында КМШга мүчө мамлекеттердин ички иштер министрлер кеңешинин 50-жыйынга Кыргызстандын ИИМ башчысы Улан Ниязбеков катышты.Анда Азербайжан, Беларусь, Казакстан, Россия, Өзбекстан, Тажикстан, Түркмөнстандын ички иштер министрликтеринин жетекчилери болгон. Андан сырткары КМШга мүчө мамлекеттердин аймагындагы уюшкан кылмыштуулукка жана кылмыштын башка коркунучтуу түрлөрүнө каршы күрөштү координациялоо боюнча бюронун директору Олег Коновалов катышкан.Чогулгандар кылмыштуулук менен күрөшүүдө биргелешкен чараларды көрүү боюнча маселелер көтөрүлгөн. Андан сырткары шериктеш мамлекеттердеги кылмыштуулук менен болгон кырдаал, өзгөчө кооптуу кылмыштарга каршы күрөшүү боюнча мамлекеттер аралык программаларды аткаруунун жүрүшү, баңги заттарды жайылтууга бөгөт коюу, курал сатуу, трансулуттук кылмыштуу топторго, террорчулукка жана экстремизмге каршы күрөшүү иштери талкууланган.Кеңешмеде министр Ниязбеков сүйлөп, кылмыштуулук менен күрөшүүдөгү ийгиликтүү ишмердүүлүк көп жагынан министрликтердин өз ара иштешүүсүнө байланыштуу экенин белгилеген.
Быйыл өлкө боюнча 1-класска 113 миңден ашуун бала кабыл алынганын Билим берүү жана илим министрлиги маалымдады. Билдирмеге ылайык, учурда баланын катталган жерине карабастан бош орундары бар мамлекеттик жана муниципалдык мектептерде 1-класска электрондук каттоо жүрүүдө.Ата-эне же мыйзамдуу өкүлдөр шилтемеси аркылуу мектеп жашына жеткен баланы каттоо үчүн өтүнмө жибере алышат. Электрондук каттоо 30-августка чейин созулат. Белгилей кетсек, электрондук каттоо эки этапта өтүүдө.Биринчи этап 8-апрелден 2-июнга чейин расмий каттоодо турган жери боюнча жүргүзүлгөн. Экинчи этапта бош орундары бар мектепке катталса болот.
Парижде өтүп жаткан Олимпиада оюндарында беш спортчу өлкө намысын коргойт. Алгачкылардан болуп эркин күрөш боюнча 125 килограмм салмакта Айаал Лазарев жубатуучу беттеште Канаданын спортчусу Амарвир Деси менен кез келет. Кыргызстандык балбан буга чейин жеңилип калган ирандык спортчу финалга чыгып, коло үчүн ат салышууга мүмкүнчүлүк жаралды. Бул беттештер саат 15:00дө башталат. Артынан саат 15:30да 65 килограммда Эрназар Акматалиев 1/8 финалда венгриялык Исмаил Масукаев менен күрөшөт. Ушул эле баскычтан 76 килограмм салмакта Айпери Медет кызы өзүнүн алгачкы атаандашы кытайлык Ван Цзюань менен беттешет.Кечки саат 23:15терде Айсулуу Тыныбекова коло үчүн беттеште румыниялык Криста Инце менен канадалык Анна Гонзалес жубунун жеңүүчүсү менен кез келет. Бул экөө 15:00дөгү жубатуучу бетештерде кезигишет. 11-августка караган түнү саат 01:47де бокс боюнча 57 килограмм салмакта Мунарбек Сейитбек уулу өзбекстандык Абдумалик Халоков менен алтын үчүн рингге чыгат.