БИШКЕК, 9-авг. — Sputnik. Президент Садыр Жапаров Астана шаарында Борбор Азия мамлекеттеринин башчыларынын VI консультативдик жолугушуусунда сүйлөп, учурдун маанилүү маселелерине токтолду.
Ал аталган иш-чаранын форматы жогорку суроо-талапка ээ экендигин жана аймактык кооперацияны бекемдөөгө зарыл болгон кошумча дем бере тургандыгын канааттануу менен белгилеген.
Жапаров Кыргызстандын экономикасы туруктуу темп менен өнүгүп жатканын, чет өлкөлүк инвесторлордун катышуусу менен ири инфраструктуралык жана эл аралык долбоорлорду ишке ашыруу башталгандыгын айткан. Буга гидроэлектростанциялар, автомобиль жолдорун куруу, аэропортторду модернизациялоо жана башкалар кирерин белгилеген.
Транспорттук инфратүзүмдөрдү өнүктүрүү багытында эл аралык маанидеги автомагистралдарды жакшыртууну, өлкө боюнча заманбап аэропортторду курууну, Кыргызстандагы эң ири стратегиялык Түндүк — Түштүк автожолун салууну, ошондой эле Кытай – Кыргызстан – Өзбекстан темир жолунун курулушу тууралуу кеп салган. Буга байланыштуу аймактын өлкөлөрү аркылуу жаңы мультимодалдык каттамдарды жана транспорттук коридорлорду түзүүнүн варианттарын карап чыгууну сунуштады.
Президент маданий кызматташуунун маанилүүлүгүнө басым жасап, бир катар биргелешкен маданий иш-чараларды өткөрүү туурасында айткан. Кыргызстан бул демилгени ишке киргизүү үчүн биз зарыл болгон аянтчаны берүүгө даяр экенин белгилеген.
Аймактык жана глобалдык коопсуздукка байланыштуу маселелерде Борбор Азия өлкөлөрүнүн өз ара кызматташуусун тереңдетүү жана күч-аракеттерин бириктирүү зарылдыгын билдирген.
БУУнун уставында белгиленген эл аралык укуктун жалпы таанылган ченемдерин жана принциптерин так сактоо зарылдыгы жакшы көрүнүш экенине токтолгон.
"Азыркы дүйнөдөгү бардык келишпестиктер сүйлөшүү столунда тынчтык жолу менен гана чечилиши керек. Кыргызстан үчүн Афганстандагы тынчтык жана туруктуулук аймактык коопсуздук тутумундагы артыкчылыктуу негизги шарттардын бири", — деген Жапаров.
Мамлекет башчы аймактын өлкөлөрүнүн өз ара түшүнүшүүгө жана биргелешкен аракеттерге умтулуусу бүткүл аймактын туруктуу өнүгүүсү үчүн бекем негиз түзөрүн баса белгилеген.