БИШКЕК, 5-авг. — Sputnik. Нарын районунун Эчки-Башы айылында сүт топтоо пункту ачылганын президенттин облустагы өкүлчүлүгү билдирди.
Ал "Сүт секторунун өндүрүмдүүлүгүн комплекстүү жогорулатуу" долбоорунун алкагында ишке ашырылган.
Сүт топтоочу борборго бир тонналык 11 даана цистерна алынган, алардын баасы 2 миллион 800 миң сомду түзгөнү маалым болду.
"Долбоор башталгандан бери Нарын облусу боюнча үч миң адам мыкты делген сүт фермаларында окуудан өттү. Мындан тышкары, бир жарым жылда үч миң уй жасалма уруктандырылып, 1500 асыл тукум музоо алынган. Жакында Каржы министрлигинин колдоосу менен долбоор аркылуу дагы эки миң фермерге асыл тукум музоолуу уй сатып берүү пландалууда", — деп билдирди президенттин Нарындагы өкүлчүлүгү.