БИШКЕК, 4-авг. — Sputnik. Америкалык ишкер Илон Маск Улуу Британиядагы массалык башаламандыктан улам X социалдык тармагына өлкөдө жарандык согуш болорун жазды. Бул тууралуу РИА Новости кабарлады.
Британияда үч бала бычакталгандан кийин ашынган оңчулдардын нааразылык акциялары күч алган. Ал эми Times гезити дем алыш күндөрү 35тен кем эмес акция күтүлүп жатканын жазган.
Маск британдык шаарлардын биринде болгон нааразычылык акциясынын видеосун көрүп, "жарандык согуш сөзсүз болот" деп комментарий берген.
Британиялык Мерсисайд графынын полициясы 29-июлда Саутпорт шаарында жаш балдарга бычак менен кол салуу болгонун маалымдаган. Анда үч бала каза болуп, дагы бир нече бала менен эки чоң адам ооруканага оор абалда жеткирилген.
Тартип сакчылар 17 жаштагы өспүрүмдү кармап, аны үч адамды өлтүрдү жана дагы 10 адамды өлтүрүүгө аракет кылган, ошондой эле курал сактаган деп айыптаган. Полиция кол салуунун терроризм менен байланышы жоктугун айтууда. Алардын маалыматы боюнча, кол салуу балдардын бий жана йога сабактары учурунда болгон.
Саутпорт, Лондон жана башка шаарларда жашаган элдин нааразычылыгы кол салган өспүрүм качкын экен деген такталбаган маалымат тараган соң күчөп, массалык башаламандыкка айланган. Кийинчерээк Sky News телеканалы кылмышка шектүү руандалык үй-бүлөдөн экенин, Уэльсте төрөлгөнүн кабарлаган. Укук коргоо органдарынын маалыматы боюнча, башаламандык ашынган оңчулдардын "Англиянын коргонуу лигасы" тарабынан уюштурулган. Айрым британиялык ЖМКлар ашынган оңчулдардын акцияларын тутандырууга Россиянын катыштыгы бар экенин жазып чыккан. Бирок РФтин Лондондогу элчилиги муну четке каккан.