Бишкек ТЭЦи көгүлтүр отко өтсө жылуулук режими туруктуу кармалат. Муну көмүр жагылган от казанда сактоо өтө кыйын. Бул тууралуу Арзымат Алдаяров Sputnik Кыргызстан радиосунун эфиринде маек куруп жатып билдирди.
Анын айтымында, атайын автоматташтырылган системалардын жардамы менен бөлмөдөгү жылуулук температурасы бир калыпта болот.
"ТЭЦти газга өткөрүүдө техникалык жумуштарды жасоонун кереги жок. Былтыр борбордун эки от казанын толук газга которуп, сыноодон өткөрдүк. Көмүр камсыздаган кубаттуулукту бере аларын текшердик. Эки сутка иштеп, долбоордо каралган жылуулуктун кубаттуулугун чыгарып берди. Ошондуктан көгүлтүр отко өтүүдө эч кандай маселе жаралбайт. ТЭЦ газга өтсө жылуулук режими стабилдүү кармалат. Муну көмүр жагылган от казанда сактоо өтө кыйын. Буга чейин бөлмө ысып кетип, терезени ачып желдетишчү. Муну менен жарандар абаны ысытчу. Газга өтүү жолу менен эми мындай учурлар болбойт. 2022-жылга чейин Кыргызстандын түштүк тарабына газ Өзбекстандан, түндүк тарабына Казакстандан келчү. Бирок акыркы эки жылда түндүк тарапка көгүлтүр от Казакстан аркылуу транзит менен Россиядан келип жатат. Газ өткөргүч өткөн жылытуу сезонунда өзүнүн долбоорунда каралган кубаттуулугун 108 пайызын иштеди. "Газпром Кыргызстан" менен Казакстан, Өзбекстан өлкөлөрүнүн ортосунда чоң стратегиялык келишимдерге кол коюлду. Максаты — 2040-жылга чейин республиканы отундун бул түрү толук камсыздоо. Анын алкагында газ өткөргүчтүн экинчи трубасы курула баштайт. 2026-жылдан баштап Кыргызстанга келип жаткан көгүлтүр оттун көлөмүн 4-5 эсе көбөйтүүгө мүмкүнчүлүк болот. Ошондо тарта ТЭЦти толук газга которобуз. Ага чейин ТЭЦ-2 жана "Бишкексельмаш" курулуп бүтсө, алар да өтөт", — деди Алдаяров.