Олимпиада — 2024: Денис Петрашов уюштуруу начар деңгээлде болгонун айттыКыргызстанда сөөк чучугун алмаштыруу боюнча операция жасалатМыйзамсыз курулган объектилерди мыйзамдаштыруу каралууда алдыда кененирээк2024-жылга чейин курулган объектилерди легалдаштыруу сунушталууда. Тиешелүү демилге коомдук талкууга чыгарылды. Документти министрлер кабинетине караштуу Архитектура, курулуш жана турак жай-коммуналдык чарба мамлекеттик агенттиги иштеп чыккан. "Өзү билемдик менен тургузулган көп кабаттуу үйлөрдүн статусу азыркыга чейин аныкталган эмес. Мындан улам андай тамдардын жашоочуларынын, курулушчулар менен үлүшчүлөрдүн укуктары бузулуп келет. Башкача айтканда, бул имараттар сүрдүрүлүшү керек, аларда адамдар жашап, коммуналдык кызматтарды төлөшөт. Ушул кемчиликти жоюу максатында токтом долбоору даярдалды", — деп жазылган доументтин негиздемесинде. Мыйзамдаштыруу жол-жобосу курулуш ченемдерине жана эрежелерге ылайык келген 2023-жылдын 31-декабрына чейин тургузулган курулуштарга тиешелүү болору кошумчаланган. Курулушу бүтө элек имараттарды атайын комиссия карап, курулуп жаткан объектилердин реестрине киргизилет жана эреже бузбай курулганы көзөмөлдөнөт.
Эне жана баланы коргоо улуттук борборунда ходжкин лимфомасы менен ооруган 14 жаштагы бейтапка сөөк чучугунун аутологиялык трансплантациялоо операциясы жасалат. Бул тууралуу Саламаттык сактоо министрлигинен кабарлашты. Дагы эки бейтап химиотерапия курстарын аяктагандан кийин сөөк чучугун алмаштырууга даярдалат. Сөөк чучугунун аутологиялык трансплантациясы – бейтаптын өзүнүн өзөктүү клеткаларын колдонгон заманбап жана эффективдүү дарылоо ыкмасы. Бул ыкма иммунологиялык кагылышуулардын коркунучун азайтат жана дарылоо натыйжаларын жакшыртат. Беш курс химиотерапиядан өткөн бейтапка жасалуучу бул маанилүү операция ага толук сакайып кетүүгө үмүт берерин министрлик билдирди.
Париждеги олимпиадалык оюндарды өткөрүүдө уюштуруу жана түзүлгөн шарт начар болгонун кыргызстандык спортчу Денис Петрашов айтып берди. Адегенде эле азык-түлүктөн көйгөй жаралган."Атлеттердин жарымы эле келгенде ашканада узун кезек болуп, жегенге тамак калбай калып жатты. Массалык нааразычылыктан кийин, эки күн өткөн соң муну оңдошту. Ошондой эле кондиционер жок, бир вентилятор турду", — деди спортчу журналист Мария Ивановага берген маегинде. Спортчу биринчи жарыштагы жыйынтыгы күтүүсүз болгонун айтып, муну бассейндин конструкциясына тиешелүү "жай аккан" суу менен байланыштырды. Олимпиадалык бассейндер адатта 3 метр тереңдикте болот, бирок Парижде суучулдар 2,2 метр тереңдиктеги бассейнде күч сынашкан. Мындай айырма ылдамдыкты азайтып, соңку жыйынтыкка таасирин тийгизет.
Футбол боюнча Кыргызстандын курама командасынын гимнине сынак жарыяланды. Бул тууралуу Кыргыз футбол союзунун соцтармактагы баракчаларына жарыяланды. Маалыматка ылайык, конкурска композиторлор, акындар катыша алат. "Сизде кыргыз футболунун тарыхында калуу үчүн уникалдуу мүмкүнчүлүк бар. Жаңы гимндин автору болуп, келечектеги ийгиликтерибизге жана жеңиштерибизге салым кошуңуз", — деп жазылган биримдик тараткан маалыматта. Даяр иштерди marketing@kfu.kg электрондук дарегине жөнөтүү керек. Сурап-билүү үчүн телефон: +996 (558) 555 537.